Bazogaba ngesipiliyoni abeDowns
UGANDAGANDA weMamelodi Sundowns u-Asavela Mbekile ugabe ngesipiliyoni saleli qembu sokudlala namaqembu asenhla ne-Afrika kuma-quarter-final eCaf Champions League.
Abafana Ba Style bazodudulana neWydad Casablanca yaseMorocco kuma-quarterfinal alo mqhudelwano. ISundowns iyona elwela ukuvikela isicoco ngemuva kokusidla nyakenye.
Ngempelasonto kaSepthemba 8, iSundowns izokwamukela iWydad ekhaya bese kuthi ngempelasonto kaSepthemba 15 idlale ekuhambeni.
Esigabeni samaqoqo iSundowns ihlulekile wukunqoba ekhaya. Idlale kabili ngokulingana, yahlulwa kanye.
UMbekile obeyibambile iSundowns ibambana ngo 1-1 ne-AS Vita yaseDR Congo emdlalweni wokugcina wamaqoqo ePitoli, utshele abezindaba ngemuva komdlalo eLucas Moripe Stadium ukuthi isipiliyoni sokudlala kakhulu namaqembu asenhla nase-Afrika sizobasiza kakhulu uma sebebhekene neWydad.
“Kuzoba ngumdlalo onzima. Umqansa uzonyukela kakhulu uma sesidlala ekuhambeni ngoba iningi la maqembu asenhla ne-Afrika ayingozi kakhulu uma esekhaya. Thina kumele senze umsebenzi ekhaya. Into emqoka wukuthi sishaye amagoli amaningi uma sesidlala lapha ekhaya. Sesidlale nenqwaba yamaqembu asenhla ne-Afrika. Lokho kuzosisiza kakhulu. Kula masizini adlule sidlale neZamalek, ES Setif neEsperance. Ngakho sesiyazi ukuthi yini okumele siyilindele kula maqembu. Okumnandi sokufika kwiWydad sazi ukuthi yini okumele siyilindele kuyona,” kusho uMbekile. ISundowns ibheke ukulandela ezinyathelweni zamaqembu afana no-Al Ahly, TP Mazembe ne-Enyimba aseke avikela isicoco seChampions League. UMbekile uhlale isikhathi eside engadlali ngesiwombe sesibili sesizini kulandela ukulimala. “Akuyona into emnandi ukulimala isikhathi eside ikakhulukazi uma usuqala ukuthola ijezi. Enye into eyenza kubenzima kakhulu ukwamukela ukulimala wukushuba kombango wejezi eqenjini. ISundowns yakhiwe ngabadlali abaseqophelweni eliphezulu. Akulula ukuvele uthi ubuya bese uqonda ngqo esikimini ,” kusho uMbekile. Khonamanjalo izolo iTimesLive ibike ukuthi uSurprise Moriri oshiye iDowns ngesizini edlule usethi khumu ekudlaleni. UMoriri ubegijima kwiHiglands Park ngesizini edlule egcine igawulwe yizembe. Kubikwe ukuthi usezobuyela kumaBrazilians eyoqeqesha enkululisa yawo.