IBaroka yethembele kuMotupa ngamagoli
USIHLALO weBaroka, uKhurishi Mphahlele, unethemba lokuthi umgadli abamboleke kwiOrlando Pirates, uGift Motupa, uzoyixazulula inkinga yokushaywa kwamagoli ecishe yabaphosa eweni ngesizini edlule.
IBaroka ibuye emidlalweni yamaPlay-Off ukuze izigcine idlala esigabeni esikhulu emuva kokuqeda endaweni ka-15 ku-log ye-Absa Premiership. Ishaye amagoli angu-26 isizini yonke, yangenelwa awu-43 nokuyenza iqembu lesithathu kwangenelwe amagoli amaningi. IBaroka ishiyana ngegoli elilodwa neHighlands neLamontville Golden Arrows abangenelwe angu-44. IHighlands Park igcine idliwa yizembe njengoba isizogijima kwiNational First Division (NFD) ngesizini ezayo. IBaroka isivele yenze izinguquko kubadlali nakubaqeqeshi okukhona kuzo ukugudluzwa komqeqeshi uMilton Dlamini osekuPlatinum Stars,yaqasha uMcDonald Makhubedu obengumqeqeshi we-Arconbush edlala kwi-ABC Motsepe eMpumalanga. Kubadlali abadedeliwe kukhona umgadli uMaboke Matlakala, Jacky Motshegwa, Mxolisi Kunene, Siphamandla Sangweni, Tshepiso Lietsisa, Siphelele Zikalala, Helder Pelembe noNkosinathi Ogle. IBaroka iboleke uMotupa owayengumgadli wayo isadlala kwiNFD noMarshall Munetsi.
“UMotupa uyalazi iqembu nendawo. Ngiyamthemba ukuthi uzoyixazulula inkinga yamagoli esibhekane nayo ngesizini edlule. Ungumgadli oseqophelweni eliphezulu yingakho simcelile kwiPirates,” kusho uMphahlele.
“Ngifundile emaphutheni angesizini edlule, okusehlele ngeke kusiphinde. Besisayinisa abadlali ngaphandle kokubahlola. Besibona umfana eshaya amagoli kwi-ABC Motsepe sivele simthathe, afike eqenjini angenzi esikulindele. Sesenza okuhlukile. Sisayinise nabadlali ababili baseZambia”
IBaroka ingelinye lamaqembu ashintshe abaqeqeshi ngesizini edlule. Igudluze uKgoloko Thobejane phakathi nesizini, izintambo zaphoselwa uMark Harrison, Jacob Sakala no-Edward Williams kodwa bamiswa emuva kokuthi behlulekile ukunikeza abaphathi isiqiniseko sokuthi bazoyiwina imidlalo emine eyayilandela. Kuvele ukuthi uSakala noWilliams bayisa leli qembu kuDisciplinary Committee yePremier Soccer League (PSL).
“Kule sizini uma singawina indebe eyodwa ngingajabula kakhulu. Asikaqedi ukusayinisa abadlali, sifuna ukuba neqembu eliqinile elizokwenza lokho kufezeke,” kusho uMphahlele.