Sebemthungathe bamthola owamaProteas

USETHOLAKELE umqeqeshi omusha wamaProteas. NgoJuni iCricket South Africa (CSA) yakhangisa ngesicelo somsebenzi wokucija iqembu lesizwe lekhilikithi.

ICSA yavala ukuthatha izicelo ngoJuni 16. Njengamanje isikhundla siphethwe nguRussell Domingo inkontileka yakhe ephela uma kuphela uchungechunge lwemidlalo emine yamaTest. AmaProteas abambene ngo 1-1 ne-England.

UChris Nenzani ongumengameli weCSA utshele Isolezwe ukuthi ithimba ebelihlunga izicelo selikulungele ukusho ukuthi ngubani ofanelwe wumsebenzi.

“Ithimba ebelicelwe ukuthi lihlunge izicelo selikulungele ukusho ukuthi ucwaningo luhambe kanjani nokuthi ngubani ofanelwe ngumsebenzi. NgoLwesihlanu sizohlangana nalo bese lisitshela. Ngemuva kwalokho sizobe sesimemezela umqeqeshi ngemuva kochungechunge lwemidlalo yama-Test elakuleli eliyidlala ne-England. Lokhu kusho ukuthi sizokhipha isimemezelo ngo-Agasti,” kusho uNenzani.

Mancane amathuba okuthi uDomingo abuyiselwe kulesi sikhundla yize esifakile isicelo. AmaProteas asanda kushaya udaka kwi-ICC Champions Trophy. UGeoffrey Toyana noMarc Boucher kuvela ukuthi bazihola phambili kubaqeqeshi okungase kukhethwe kubona umqeqeshi omusha weqembu lesizwe. Abanye abaqeqeshi okuputshuka ukuthi bazifaka izicelo nguLance “Zulu” Klusener, Makhaya Ntini, Paul Adams, Graham Ford, Stephen Fleming, Paul Adams no-Alan Donald.

UDomingo wayethathe izintambo kuGary Kirsten ngo2014. Ngemuva kochungechunge lwama-Test ne-England amaProteas azodlala neBangladesh, India ne-Australia ekhaya. EyeBangladesh izoqala ngoSepthemba bese kuthi eye-India iqale ngoDisemba. Eye-Australia izoqala ngoMashi ngonyaka ozayo.