Kumiswe ukufunda e-UKZN eThekwini
KUMISIWE ukufunda izolo esikhungweni esifundisa odokotela eNyuvesi yaKwaZuluNatal, eThekwini ngemuva kombhikisho wabafundi.
Abafundi bafuna kudedelwe umbiko ngophenyo olwenziwayo lokudayiswa kwezikhala zalabo abafuna ukuba ngodokotela.
Okhulumela le nyuvesi, uNksz Normah Zondo, uthe kumisiwe ukufunda eMedical School kulandela lo mbhikisho.
Uthe uSihlalo womkhandlu olawula inyuvesi uzohlangana nomkhandlu wabafundi ngoMsombuluko ukubhuga ngezikhalazo zabo. “Abasebenzi kudingeke baphelezelwe ngenxa yokuvalwa kwezintuba zokungena kulolu phiko okwenziwe ngabafundi. Siyakugxeka ukucekelwa phansi kwempahla okwenzekile,” kusho uNksz Zondo.
Abafundi bafuna kudedelwe umbiko okuthiwa udle u-R1.4 million owenziwe nyakenye.
Umbhikisho uqale ngoLwesihlanu olwedlule kanti abafundi bathi ngeke kufundwe ungadedeliwe umbiko.
UNobhala womkhandlu wabafundi, uMnuz Malete Tumisang, uthe bazoqhubeka kuze kudedelwe lo mbiko. Uthe kusuka kuleli sonto bekungafundwa ngoba bekhala ngokungakhishwa kombiko.
UNksz Zondo, uthe abaholi babafundi balethe uhlu lwezikhalo oluthinta izinto zokuphathwa kwenyuvesi nalo udaba lombiko wokudayiswa kwezikhala.
ISunday Tribune, enguzakwabo weSolezwe yabika ukuthi oKlebe bebephenya lezi zinsolo zokudayiswa kwezikhala.
Kuthiwa abafundi abaningi abathathwayo ngabaqhamuka ezikoleni ezingo-Quintile 1 kuya ku-3 okuyizikole ezihlwempu ezingakhokhisi mali yokufunda.
Iningi lalezi zikole zisemakhaya nasemalokishini.