Ifu elimnyama emsakazweni iVibe FM
SIKHULU isililo ngokushona komdidiyeli wezobuchwepheshe obethathwa njengenjini yomsakazo womphakathi iVibe FM.
UMdu Lekhooana (26), waseMatatiele, obeyiTechnical Producer kulo msakazo, ushone entathakusa yangeSonto ngesikhathi imoto yakhe ishayisana nenye. Kuthiwa ingozi yenzeke emgwaqweni uM4 ngase-Icesa eThekwini.
Kuvele ukuthi imoto ebishayelwa uLekhooana iphaphalazile yahamba emzileni obuphambana nezinye izimoto, yashayisana nenye, yena washonela khona lapho.
Uzakwabo abehamba naye ungeniswe esibhedlela walashelwa imihuzuko.
UMnuz Lucky Dlamini onguMphathi-siteshi kwiVibe FM uthe uLekhooana ubehamba nozakwabo odume ngelikaCoach Tsamaya osakaza ezemidlalo.
“Silahlekelwe kakhulu ngokushona kukaMdu ngoba yinsizwa ebingalali ifuna ukuthuthukisa ulwazi lwayo. Besinonyaka sisebenza naye emsakazweni kodwa umehluko ubumkhulu ngenxa yekhono lakhe. Njengoba imisakazo ibheke ebuchwephesheni obusha, iDigital Migration, bese sizilungiselele ngenxa yokuthi ubezinika isikhathi sokuthola ulwazi nemishini emisha,” kuchaza uDlamini.
Uthe umufi ubesiza kukho konke okuthinta ubuchwepheshe bomsakazo, aphinde asebenze kakhulu uma isiteshi sisakazela ngaphandle.
Uveze ukuthi ubebuye axhumanise zonke iziteshi zomphakathi uma kunezinhlelo ezifana nebezenziwa wuMasipala weTheku.
“Okuhle ukuthi ubengenawo umona kodwa ubefuna ukuludlulisela kwabanye ulwazi. Kumanje sineqholo lokuthi umsebenzi uzoqhubeka ngoba kukhona abesebafundisile,” kusho uDlamini.
Uthe sebeyile ukuyobhonga emswaneni emndenini kamufi lapho umufi ebehlala khona noninalume njengoba esashonelwa ngabazali. Ngesikhathi sokuloba uDlamini ubenomhlangano nozakwabo kuhlelwa inkonzo yesikhumbuzo kaLekhooana ezoba namuhla ngo-4 ntambama eTowers of Faith eRichmond Farm, okuyisonto likaMfu Mxo Striker Shange naye ongumsakazi weVibe.
Uzofihlwa ngoMgqibelo kubo eMatatiele kodwa kuthiwa omunye umndeni wakhe ubuKwaMashu lapho ake ahlala khona.
ULekhooana kuthiwa bese ebhalisele ukuyokwenza izifundo zeCommunications e-Unisa kanti ubeneziqu zePublic Relations Management azenza kuso lesi sikhungo.
Kusukela ngeSonto abalaleli balokhu bekhale njalo ngokushona kukaLekhooana, abanye badlulisa imiyalezo yenduduzo ezinkundleni zokuxhumana.
Okhulumela amaphoyisa esifundazweni, uLieutenant-Colonel Thulani Zwane, uthe kuphenywa icala lokubulala ngokungenhloso kanti ayikaziwa imbangela yengozi.