Kumhambela kahle kwezamabhizinisi
UMFELOKAZI waseSavannah Park akazisoli ngokuba kwezamabhizinisi ngoba selokhu angena emabhizinisini zonke izinto ziyamlungela. Kumanje usekwazi ukondla izingane zakhe ngemali engeniswa yibhizinisi lakhe.
UNkk Zamekile Nyanisa-Shozi uthe usanda kuvula indawo edayisa ukudla okuphekiwe noshisanyama, iZam’s Place, ekuyo le ndawo ngenxa yempumelelo yebhizinisi lamakhekhe.
UNkk Nyanisa-Shozi, oneminyaka angena ebhizinisini, uthe waqala ibhizinisi lokudayisa amakhekhe ethi wengeza imali ayitholayo njalo emsebenzini kanti lizochuma, wagcina esenama-oda amaningi.
“Ngagcina sengibhaka zonke izinsuku okwakwenza ngihlale ngikhathele emsebenzini. Ngo-2007 ngathatha isinqumo sokushiya umsebenzi ngiyoqhubeka nebhizinisi lami.”
Uthe ibhizinisi lakhe walenza ngempumelelo kwaze kwaphela unyaka. Umyeni wakhe wakhala ngokuthi usematasatasa kakhulu akasenaso isikhathi somndeni. Wayeka ukubhaka.
“Angiphelanga amandla, ngacabanga elinye ibhizinisi. Ngemuva konyaka ngihleli ekhaya ngingenzi lutho ngifuna into engizoyenza emini ngavula isikole sokushayela nesekhompyutha,”
Nalo leli bhizinisi uthe lathi lisahamba kahle umyeni wakhe wathi usehlala isikhathi esiningi ekulo, leso sikhathi okumele ngabe uhleli nomndeni.
“Wayengathandi ukungibona ngivuka ekuseni kakhulu ngiya emsebenzini, ngibuye ntambama. Wayebona sengathi kuzothiwa akanginakekeli. Nakuba ngangingahambisani nombono wakhe, ngamthobela. Ngazitshela ukuthi kodwa ngizoyithola enye into engizoyenza.”
Ngo-2011 uveze ukuthi wacikwa yisikhotha nehlathi elaliseduze kwemizi walishaya, wavula ingadi.
Yena nomakhelwane bakhe bavula ingadi enkulu ngezansi kwemizi yabo batshala imifino bayidayisa. Umfelandawonye wabo bawubiza ngokuthi iFunukwazi.
Izitshalo zabo bagcina bezidayisela ijele iWestville. Kusukela lapho akabange esabheka emuva waqhubeka wangena kumathenda okuphakela izingane ukudla ezikoleni. Selokhu angena ngo-2013.
Ngesikhathi enethenda nezingadi uthe besisalokhu sikhona isifiso sokwenza elinye ibhizinisi elizongenisa imali zonke izinsuku.
“Bengihlale nginesifiso sokungena emkhakheni wokudla. Ngabona ukuthi indawo yethu ayikabi nazo izinto eziningi ezikhona kwamanye amalokishi njengoshisanyama.”
Unezinyanga ezintathu evule ushisanyama athe okwamanje kusahamba kahle namakhasimende ayangena.
Unabasebenzi abayisikhombisa abamsizayo kodwa uyathanda ukuzibambela mathupha uma ekhona.
UNkk Nyanisa-Shozi, osengumfelokazi, ukholwa ukuthi ukuphikelela kwakhe kwamsiza ukuze akwazi ukondla izingane zakhe ngemuva kokushona komyeni wakhe. “UNkulunkulu sonke usabele amakhono nendlela esizophila ngayo. Ngicabanga ukuthi wayengilolongela ukuthi ngikwazi ukuthatha izinqumo eziyizo uma ngingasenaye umuntu ozolokhu engikhalima. Kunzima ukusukuma ngoba usushonelwe, kuthatha isikhathi ngaphambi kokuthi ibhizinisi livuthwe.”