INgqwele inconyiwe emahostela
UMNCINTISWANO iNgqwele Kamaskandi ayifukuli kuphela abaculi bakamaskandi kodwa ibambe elikhulu iqhaza ekuletheni uzinzo nasemahostela. Ingqwele Kamaskandi ishayelwe elikhulu ihlombe nangabahlali basemahostela.
Umholi wenhlangano yabahlali basemahostela eThekwini namaphethelo, Ubunye Bamahostela, uMnuz Mthembeni Thusi uthe bayaziqhenya kakhulu ngomqhudelwano ngenxa yomthelela obe nayo kubahlali.
Ingqwele Kamaskandi ibilokhu izungeza amahostela nabaculi bakamaskandi ukulethela abahlali ubumnandi bamahhala nokugqugquzela ukuhlalisana okuhle phakathi kwezizwe ezehlukahlukene.
Phakathi kwamahostela ahanjelwe kubalwa iKranskloof Men’s Hostel (KK) eClermont, iKlaarwater eMariannhill, iWema eLamontville, iSeventini eMlaza, iJacobs, Thokoza eThekwini, iKwaMashu neDenver eGoli. “Siyaziqhenya ngomncintiswano weNgqwele Kamaskandi kanye neSolezwe nabahleli balo. Ngokuhambela emahostela kukhombise ngokusobala ukuthi bawukhathalele kangakanani umphakathi. Ingqwele Kamaskandi iveze abaculi abaningi ebebengaziwa kodwa manje sebeyaziwa futhi sebeyadlalwa emisakazweni yomphakathi. Ibuye yabuyisa ukuzethemba ezindaweni esihlala kuzo, nanokuthi akuhlali izilwane kodwa kuhlala abantu,” kusho uThusi.
Uthe wumncintiswano wokuqala ongene emahostela ayizindawo ezibizwa ngo-alubhadwa. “Ingqwele Kamaskandi iye ngisho naseGoli, nakhona yamukelwa ngezandla ezimhlophe. Ngakho siyanxusa ukuba abafowethu nodadewethu bathenge amathikithi ezikhungweni eziwadayisayo ukuze umcimbi ube yimpumelelo. Nezinduna zabaculi zingabi yizibukeli kepha ziqinisekisise ukuphepha kwabantu emcimbini ukuze kuthi ngonyaka ozayo kwande abaxhasi, ngoba ngeke abaxhasi bande uma singabalandeli singabekezelelani.”
Umcimbi uzobe useWorkshop Centrum Park eThekwini ngoSepthemba 2 phakathi kuka-10 ekuseni no-6 ntambama. Kuzobe kushiyelana inkundla uKhuzani, Igcokama Elisha, Mjikijelwa, Bahubhe, Indodakazi Yentandane, Imfezemnyama, Osaziwayo, Amageza Amahle noQhoshangokwenzakwakhe. Abaphathi bohlelo nguZimdollar Biyela woKhozi noZalo kanye noMC Pholobas weZwi Lomzansi FM.
UThusi uthe abalandeli bangawenza umcimbi ube sezingeni lomhlaba ngokuthi bawusekele futhi baphume ngobuningi babo. Amathikithi abiza u-R80 kumaComputicket. Abaxhasi wuMnyango wezokuThutha KwaZulu-Natal, Mbawula Investments, Halfway Malanda Toyota, Papa Maize Meal, Shoprite, Zululand FM, Umgeni Water, Maz Herbal Product, Coca Cola, Cyassound Holdings noMasipala WeTheku.