Kushone oyedwa itekishi isha nabagibeli
KUPHUME isidumbu kwalimala inqwaba yabagibeli ngesikhathi itekisi ebisuka eGoli ilibangise eShowe ithungeleka ngomlilo ihamba emgwaqweni, eVryheid.
Umphakathi waseStill Water Bridge eVryheid, usamangele ngalesi sigameko esenzeke ngoLwesibili ebusuku emgwaqweni u-R33.
Ngalo uLwesibili, kuthiwa kuqale umlilo ongaziwa obuhambisana nomoya omkhulu, ngisho nayizolo ekuseni umlilo ubusasha ubuhanguhangu kwezinye izindawo ngaseVryheid.
Izimoto eziningi kuthiwa bezingasahambi kulo mgwaqo ngenxa yentuthu nomlilo.
Umshayeli wetekisi kusolwa ukuthi uhilwe yintuthu ngesikhathi itekisi idlula kulo mgwaqo, itekisi yaphaphalaza yakhalakathela otshanini obebuvutha eceleni komgwaqo.
Itekisi ithungeleke ngomlilo kwasha nabagibeli abebekuyo.
UNksz Zakhona Mtshali (29) kuthiwa ushe kakhulu, washonela khona lapho.
Abanye abagibeli kuthiwa bashe kanzima, abanye baba namanxeba angatheni. Labo baphuthunyiswe esibhedlela.
Okhulumela amaphoyisa KwaZulu-Natal, uLt Colonel Thulani Zwane, uthe kuvulwe idokodo ngesehlo.
“Amaphoyisa aseVryheid aphenya imbangela yalo mlilo. Kushone owesifazane ona-29 ngemva kokusha kwetekisi abehamba ngayo,” kusho uZwane.
Okhulumela abezimo eziphuthumayo KwaZuluNatal, uMnuz Robert McKenzie uthe: “Itekisi ishe yaphela kulesi sigameko, owesifazane obengumgibeli ulimele kanzima, washonela khona lapho. Abanye abantu sibahlolile baphuthunyiswa esibhedlela belimele.”
Uthe azikho ezinye izehlo ngokwazi kwakhe lapho kubizwe khona abezimo eziphuthumayo ukuba bazohlenga abantu abashile noma abahilwe yintuthu.
Isolezwe lithole ukuthi abalimi abaningi bakuleya ndawo bakhale ngokusha kwamapulazi abo nemfuyo.
Imizamo yabalimi yokucima umlilo ayizange iphumelele kwazise umoya ubuvunguza ngamandla.
Abaningi bebebhala kuFacebook bekhala ngokuvaleleka njengoba ngoLwesibili ebusuku bekungasadluleki kulo mgwaqo.
Imizamo yokuthola umnikazi wetekisi nomndeni woshonile kulesi sigameko ayizange iphumelele izolo, kwaze kwashaya isikhathi sokushicilela.
* Khonamanjalo eNewcastle, ngoLwesibili ebusuku, kushone abantu abane engozini yetekisi nebhasi.
Amaphoyisa aphenya amacala amane okubulala ngokungenhloso.
Okhulumela iSantaco KwaZuluNatal, uMnuz Mandla Mzelemu, ukhale ngabashayeli ababudedengu ngalezi zingozi zamatekisi ebalula neyenzeke kwaXimba ngeSonto.