I-DA ayiyiniki lutho iMeya yeTheku
IMEYA yeTheku isolwa ngokuba ngundlovukayiphikiswa ogxambukela ekuphathweni kwayo yonke iminyango.
Lezi zinsolo ziqhamuke ne-DA ngesikhathi ihlaziya izinsuku ezingu-365 iMeya uNkk Zandile Gumede esehhovisi.
UMnuz Zwakele Mncwango, umholi we-DA, uthe selokhu kufike uNkk Gumede sekusule izikhulu eziningi zeminyango ehlukene kanye nabasebenzi abaningi abanamakhono kulo mkhandlu.
“Nyakenye imeya yaqamba amanga ngokukhululwa kowayeyimenenja yalo mkhandlu uMnuz Sibusiso Sithole enkontilekeni yakhe yathi wazicelela yena ukukhululwa. Ngemuva kwesikhathi uSithole wakuphika lokhu wathi uphoqiwe ukuthi ashiye. Kwasuswa uMnuz Musa Mbhele owayeyiphini lakhe kuphendlelwa intandokazi kaNkk Gumede uMnuz Phillip Sithole. Siyazi ukuthi uMbhele wasuswa ngoba wanqaba ukusayina amaphepha e-Essence Festival,” kusho uMncwango.
Uthe konke lokhu uNkk Gumede ukwenza ngoba efuna ukuzizwa ukuthi unamandla futhi uphethe wonke umuntu kulo masipala.
Uqhube wathi imeya yephula imigomo nemithetho okumele ilandelwe.
“Muva nje imise iNhloko yoMnyango wamaPaki nokuNgcebeleka, uMnuz Thembinkosi Ngcobo ingayilandelile imigomo. UNgcobo uye enkantolo, yanquma ukuthi akuhoxiswe ukumiswa kwakhe. Abakhokhi bentela kumele bakhokhe lezi zindleko zasenkantolo, baphinde bakhokhele umcimbi wokuhlanganiswa kwezinhlanga ezahlukene iSocial Cohesion owamiswa,” kusho uMncwango.
Uthe imeya kumele ifunde ukwehlukanisa phakathi kwepolitiki nokuphathwa komkhandlu ngoba uma ingakwenzi lokhu umkhandlu uzowa.
Uthe selokhu kungene uNkk Gumede esikhundleni sobumeya imibiko mayelana nokusebenza kwemali iyafihlwa.
“Ukungacaciswa kwendlela imali esebenza ngayo yikho okuzokwenza ukuthi umasipala uwe. Imeya ishintshe zonke izinhlelo zokwakha ebeziseqhulwini ngenhloso yokuthi kuvuleke amathuba omsebenzi. Bekunohlelo lokwakhiwa kwebhilidi elide kunawo wonke eThekwini obelusesigabeni esibalulekile. Njengoba sekuphethe uNkk Gumede, selusesigabeni sesithathu ezintweni ezimqoka okumele zenziwe okusho ukuthi alusabalulekile. Ukwenze lokhu ngoba efuna ukushintsha yonke into,” kusho uMncwango.
UMnuz Mthunzi Gumede okhulumela imeya yeTheku ephendula kulezi zinsolo uthe uNkk Gumede uzoba nesithangami nabezindaba ngoLwesithathu lapho ezochaza khona ngomsebenzi asebewenzile njengoba sekuphele unyaka esehhovisi.
“Kuningi osekwenziwe yimeya ngalesi sikhathi. Yebo zikhona izingqinamba ezibe khona kodwa uNkk Gumede uzimisele ukufeza zonke izethembiso ezenziwe yi-ANC ngesikhathi ikhankasela ukhetho. I-DA iphethwe ngumona ngobuholi obukhonjiswe yiMeya yeTheku,” kusho uGumede.