Kuzocaca maduze ngekusasa leSeda eThekwini
KUZOCACA kusasa ngekusasa lesikhungo esithuthukisa osomabhizinisi abancane eThekwini, iSmall Entreprise Development Agency (Seda) esiseduze kwerenki yaseNanda, emakethe.
Isolezwe libuze abakwaSeda kuzwelonke ukuthi ngabe kuzokwenzekani kosomabhizinisi abangu-60 abasebenzela kule ndawo uma kuwukuthi lesi sikhungo sigcina sivaliwe.
UNkk Yolisa Mkhize ongumphathi wezokuXhumana kwaSeda kuzwelonke, uthe baxoxisana nophiko lwabo oluseThekwini ngalolu daba.
“AbakwaSeda eThekwini bazokhipha isitatimende sabezindaba ngoLwesihlanu ukucacisa ngalolu daba. Asazi ukuthi osomabhizinisi abangu-60 abasebenzela kulesi sikhungo bazokwenzenjani ngoba ukusebenzisa kwabo isikhungo wudaba oluphakathi kwabo nomnikazi wendawo. Thina njengoSeda asikwazi ukungena odabeni oluphakathi kukamasitende nesiqashi,” kusho uNksz Mkhize.
Umphathi wakwaSeda eThekwini uMnuz Protas Madlala, uthe usesebenzisa imali yakhe ukugcina le ndawo isebenza njengoba esefake u-R360 000 ophuma ephaketheni lakhe. Uveze ukuthi usekhulumile noNgqongqoshe woMnyango wokuThuthukiswa kwamaBhizinisi Amancane, uNkk Lindiwe Zulu, owezokuThuthukiswa koMnotho KwaZuluNatal uMnuz Sihle Zikalala kanjalo noNdunankulu waKwaZulu-Natal uMnuz Willies Mchunu.
UMnuz Bongani Tembe obhekelele ezokuxhumana eMnyangweni kaZikalala, uthe bayitholile incwadi kaMadlala futhi bamchazelile ukuthi bayazwelana naye kodwa ngebhadi umnyango awunayo imali ongabasiza ngayo. UMnuz Ndabezinhle Sibiya osehhovisi likaMchunu, uthe uNdunankulu uyalulandela udaba lwakaSeda, useludlulisele kwiKZN Planning Commission esebenzisana nezinhlaka zosomabhizinisi.
Abehhovisi likaNkk Zulu bathe ungqongqoshe wenza konke okusemandleni ukuqinisekisa ukuthi siyatholakala isixazululo odabeni lwakaSeda.