UNobhala weCosatu eKZN uqaphelisa abe-ANC
INKOMBANKOMBANE ephakathi kwamalungu enhlangano ebusayo i-ANC ngabavote namaqembu aphikisayo ngesikhathi kuvotelwa isiphakamiso sokungamethembi uMengameli Jacob Zuma ngasekuqaleni kwale nyanga, siqhubezela phambili uqhekeko kule nhlangano.
Lokhu kushiwo nguNobhala weCosatu KwaZulu-Natal, uMnuz Edwin Mkhize (osesithombeni) ngesikhathi lo mfelandawonye wezinyunyana ubize isithangami nabezindaba eThekwini izolo ukuzocacisa ngezinqumo zabo ezithathwe emhlanganweni wesifundazwe obungesonto eledlule.
“I-ANC kumele ikuqaphele kakhulu lokhu okwenzeka ezinhlakeni zeqembu ukuthi kungangenisi amanzi ngomsele eqenjini. Ukukhomba amanye amalungu asolwe ngokuthi avote naphikisayo esiphakamisweni sokungasabethembi ubuholi bukamengameli ngaphandle kobufakazi obubambekayo, kungagcina sekunikeza amaqembu aphikisayo amandla okuhlukanisa iqembu,” kusho uMkhize.
Uthe i-Cosatu ayizihlanganisi noqhekeko olusenhlanganweni ebusayo, kodwa inhloso yayo ukudala ubumbano yingakho yeseka iPhini likaMengameli we-ANC uMnuz Cyril Ramaphosa ukuthi kube nguye umengameli olandelayo wale nhlangano.
“Kuyasijabulisa ukuthi nakulesi sifundazwe zikhona izinhlaka ezeseka uRamaphosa. Namanje sisamile esinqumeni esathathwa esigungwini sikazwelonke salo mfelandawonye sokuthi umengameli kumele ehle esikhundleni.”
Uthe bazoba nezinhlelo lapho uRamaphosa azoba nemihlangano namalungu abo emazingeni aphansi ezindaweni ezahlukene esifundazweni ukuze adlane indlebe nabasebenzi ngezinkinga zabo njengoba benza nakuMengameli Zuma ngesikhathi esakhankasela esobumengameli. Kuphinde kwavela ukuthi emhlanganweni kunqunywe ukuthi bazokhulumisana namalungu abo okungabasebenzi ukuthi bahlale bemi ngomumo belindele ukungena emgwaqweni uma udaba lokudilizwa kwabasebenzi nokulahleka kwemisebenzi okwenziwa yinkampani iRainbow Chickens kungasukunyelwa.
I-Cosatu iphinde yakhala ngohlelo olwenziwa ngabakwaSanral lokuthi kube khona imizila ezivulekelayo eyaziwa ngo-Shesha Lanes kumatoll gates, yathi ukwethulwa kwayo kwalahlekisela abantu ngemisebenzi.
UMkhize ubehambisana noSihlalo weCosatu esifundazweni uNksz Beauty Zibula noNobhala we-Nehawu weKZN uMnuz Phakamile Ndunakazi.