Kuxoshwe umfundi odlwengulelwe phakathi esikoleni
UXOSHIWE esikoleni umfana (12) otholwe edlwenguliwe ekilasini lakhe esikoleni sabakhubazekile eMgungundlovu ngoLwesine olwedlule ntambama. Kuthiwa iphini likathishanhloko lithe kalisamdingi kulesi sikole emva kwalesi sehlo.
Umzali walo mfana, eligodliwe igama lakhe ukuvikela ingane, uthi uzwa ubuhlungu ngendodana yakhe edlwengulwe yabe isixoshwa esikoleni.
Utshele Isolezwe ukuthi ngoLwesine ngabo-4 ntambama wathola ucingo kumamncane wakhe emazisa ukuthi indodana yakhe ayitholakali esikoleni, umalume oyilandayo ebika ukuthi iyona yodwa engagibelanga emotweni elanda izingane.
“Ngafonela umyeni wami ngimazisa ukuthi ingane kuthiwa ayitholakali esikoleni. Sahamba naye sayokhuluma nonogada simbuza ukuthi akayibonanga yini indodana yami.
“Wasitshela ukuthi akayibonanga futhi wonke amakilasi akhiyiwe. Ngacela ukuthi angivumele ngiyobheka indodana yami ehostela okuhlala kulo izingane, ngathola ukuthi ayikho,” kusho umzali.
Uthe bacela izinombolo zabaphathi besikole bazinikwa ngowesifazane ophekela izingane.
“Sakhetha ukuthi kufanele siyoyibika emaphoyiseni ingane ukuthi idukile kodwa sathola ukuthi ingane ivalelwe kwelinye ikilasi. Sabiza amaphoyisa kwathi uma isivulelwe othisha bathi mhlawumbe ibizivalele kwelinye igumbi elikulelo kilasi.
“Okuxakayo wukuthi ukhiye wawulenga ngaphandle kungathi kunomuntu obeyivalele,” kusho umzali.
Uthe bahambisa indodana eThuthuzela Centre okuyisikhungo esihlola abantu ukuthi kabanukubezwanga yini ngokocansi noma abashaywanga kwase kutholakala ukuthi idlwenguliwe. “Udokotela wakuqinisekisa ukuthi udlwenguliwe, wasiyalela ukuthi sivule icala. Amaphoyisa ophiko olubhekele udlame emindenini, amacala abesifazane nezingane olusePlessislaer, eMgungundlovu, yiwona aphenya leli cala.
“Okungiphatha kabi wukuthi indodana yami idlwengulwe emagcekeni esikoleni futhi udokotela uthe isidlwengulwe izikhawu eziningi,” kusho umzali.
Uthe ufuna ubulungiswa ngoba selokhu evule icala indodana yakhe ixoshiwe esikoleni yiphini likathishomkhulu elithe akayifunele esinye isikole.
“Ngilubikile udaba eMnyangweni wezeMfundo, kwathiwa ingane angiyihambise esikoleni kodwa esikoleni bathi abayidingi futhi bayalunyathela udaba lwami.
“Ngicela ungqongqoshe wezemfundo angenelele ngoba njengoba ingane ikhubazekile kusho ukuthi ayikwazi ngisho ukukuchaza okwenzeke kuyona nokuthi ngubani oyidlwengulile,” kusho umzali.
Ugqugquzele abazali ukuthi baziqaphele izingane zabo, bazihlole uma zibuya emakhaya ngoba kuyacaca ukuthi kaziphephile kulesi sikole.
UMnuz Kwazi Mthethwa okhulumela ungqongqoshe wezeMfundo KwaZulu-Natal, uMnuz Mthandeni Dlungwana, uthe kubaphatha kabi ukuzwa udaba olunjengalolu, wanxusa umzali ukuthi abikele izikhulu zomnyango ngalo futhi athathe namagama azo khona kuzobhekwa ukuthi angasizakala kanjani.
Uthe ungqongqoshe uzolusukumela phezulu ngoba akafuni umuntu ohlukumeza abafundi.
ULieutenant Colonel Thulani Zwane wamaphoyisa KwaZuluNatal ukuqinisekisile ukuthi kuvulwe icala lokudlwengula kanti bekungakaboshwa muntu.