ICosas ifuna uhulumeni aqede eyokucwasa nodlame ezikoleni

IFUNA uhulumeni eze nezinhlelo zokuqeda udlame nokucwasa ezikoleni iCongress of South African Students (Cosas) emuva kokwanda kwezigameko zabafundi abalwayo nokuma kwezifundo esikoleni saseThekwini, iGeorge Campbell.

UMnuz Sphamandla Khomo onguNobhala weCosas eThekwini, uthe abahambisani nobandlululo ezikoleni ezifana neGeorge Campbell nezinye futhi bafuna uhulumeni ayilungise le ndaba.

“Siyajabula ukuthi bamisiwe othisha ababili baseGeorge Campbell kodwa sifuna uhulumeni eze nezinhlelo ezicacile zokuqeda ukucwaswa kwabafundi nodlame oluqubuka ezikoleni. Sinomkhankaso wokuhambela izikole ezihlukahlukene siqwashisa abafundi ngokucwasa nokubayala ukuthi bayeke ukulwa kodwa baxoxisane uma bengaboni ngaso linye,” kusho uKhomo.

Uthe kubaphethe kabi ukunikezwa ibheyili ka-R1 500 komfundi waseSiyathuthuka Secondary eNanda, owashaya kanzima intombazane ayefunda nayo ngonyaka odlule.

Khonamanjalo isimo sesibuyele kwesijwayelekile eGeorge Campbell emuva kokuphazamiseka kokufunda ngoLwesibili, othisha beqhinqe ehhovisi labo lokuphumula bethi ngeke bafundise uma ozakwabo abamisiwe bengabuyi.

Bebefuna kumiswe nabafana abasolwa ngokuhlohla abanye abafundi ukuthi batelekele izigameko zokucwasa kulesi sikole.

UMnyango wezeMfundo umise othisha ababili baseGeorge Campbell, oyedwa osolwa ngokushaya abafundi omunye osolwa ngokubabiza ngezimfene.

Inyunyana yothisha iNaptosa ithe amalungu ayo afuna bamiswe abafana abasolwa ngokuhlohla abafundi ukuthi bateleke. UMnuz Kwazi Mthethwa okhulumela uNgqongqoshe wezeMfundo KwaZuluNatal uMnuz Mthandeni Dlungwane, ukuqinisekisile ukuthi ukufunda nokufundisa kuke kwaphazamiseka ngoLwesibili eGeorge Campbell wathi isimo sesibuyele kwesejwayelekile.

“Sithe iNaptosa ayilinde uphenyo lo mnyango olubheka konke okwenzeke eGeorge Campbell,” kusho uMthethwa.