Kuzothungathwa umethuli we-Our Perfect Wedding
ISITESHI esisakaza uhlelo lwemishado, i-Our Perfect Wedding, iMzansi Magic (DStv channel 161), sizothungatha umethuli omusha walolu hlelo.
Izindaba zivele izolo ngemuva kwembiko ethi umethuli walo okhona manje uThembisa Mdoda uyashiya kulo.
UBongiwe Potelwa-Metsing, weMzansi Magic, uthe uThembisa uyashiya kulolu hlelo njengoba inkontileka yakhe iphela maduzane.
“Sizokhipha isitatimende esizocacisa konke ngokushiya kukaThembisa. Kodwa maduze sizohambela amadolobha ahlukene sithungatha umethuli wohlelo,” kusho yena.
UThembisa ushayele uhlelo ngemuva kukaTumi Morake, owayethula isizini yesihlanu.
UThembisa ube ngumethuli wokuqala ukwethula isizini walo isikhathi eside.
Kamuva nje isikhala sakhe sike sabanjwa nguJessica Nkosi noNomsa Buthelezi ngaphambi kokuthi abuye futhi ekhefini lakhe.
UThembisa ubesezakhele ugazi kubathandi bohlelo kangangokuba uma isikhala sakhe sike savalwa ngomunye umethuli bekuba nokukhononda.
Into ebithandwa ngabalandeli ngaye wukugqoka kwayo ngoba ubeyidla indwangu futhi yonke into abeyigqoka ibimfanela.
Lokhu bekuchaza abantu abaningi abangabalandeli bohlelo ngisho abesilisa.
Muva nje uthando lwakhe luphinde lwakhula kubabukeli balo ngemuva kokuba wusizo komunye umshado owawukhonjiswa eThekwini umakoti engalingwana yingubo yakhe yomshado.
Abantu bathatheka kakhulu yindlela uThembisa aba wusizo ngayo futhi bancoma ubuntu nozwela analo.
Abafuna ukuzama inhlanhla yomethuli wohlelo kumele kube ngoneminyaka engu-25, nangaphezulu, abe owakuleli.
Kusuka ngo-Septemba 2, intsha yase-East London ingaya ePremier Hotel Regent bese kuvalwa eGoli ngoSeptemba 16, eThe Pyramid.