IPhalamende odabeni lukankosikazi kaMugabe
KUZONGENELELA iPhalamende odabeni lokunikwa ushwele kukaNkk Grace Mugabe ongunkosikazi kaMengameli waseZimbabwe uMnuz Robert Mugabe osolwa ngokushaya kanzima intokazi yakuleli uNksz Gabriela Engels.
UNgqongqoshe wezangaPhandle uNkk Maite-Nkoana Mashabane, uthe usebhalele uSomlomo wePhalamende uNksz Baleka Mbete incwadi echaza ngoshwele onikezwe uNkk Mugabe. UNkk Mugabe washaya uNksz Engels ngentambo emuva kokuba emfice endlini namadodana akhe. UNksz Engels uvulele uNkk Mugabe icala lokumshaya esho nokuthi vele yena nabangani bakhe bajwayelene namadodana akwaMugabe.
Esithangamini nabezindaba ebesisePitoli izolo, uNkk NkoanaMashabane uthe balandela umthetho ngokubhalela uSomlomo.
Uthe njengomuntu ongumama, le ndaba yakwaMugabe inzima kuye. Akucaci ukuthi uNkk NkoanaMashabane uzobizelwa ePhalamende ukuthi ayochaza kabanzi ngalolu daba noma cha.
Selokhu kwenzeke lesi sigameko kumiswe amabhanoyi akwaSAA eZimbabwe, nalokhu kuzodingidwa ePhalamende.
UNkk Nkoana-Mashabane uphinde wadlulisa amazwi enduduzo kubantu baseSierra Leone lapho kube nezikhukhula ezibulale inqwaba yabantu.
Uthe elakuleli lizonikela ngo-R8 million kubantu baseSierra Leone ngokohlelo lwe-United Nations World Food Programme. Inhlangano esebenzela umphakathi i-Oxfam South Africa icele abantu ukuthi balekelela abaseSierra Leone abakhahlanyezwe yizikhukhula, emuva kokubhekana nodlame nesifo i-Ebola. Abafisa ukusiza bangathumela i-sms enegama elithi Relief Relief ku-38510. Ama-sms abiza u-R10.