I-SAA idinga ukutakulwa ngoR13 billion
ININGIZIMU Afrika ikhokha u-R3.5 billion ngonyaka ukuqasha amabhanoyi asetshenziswa yiSouth African Airways (SAA). Ayisishiyagalolunye kuphela amabhanoyi ale nkampai angaphansi kukahulumeni, angu-51 abolekwa kwezinye izinkampani.
Lezi zindaba zivezwe yiPhini likaNgqongqoshe wezeziMali kuleli, uMnuz Sfiso Buthelezi, izolo ngesikhathi ekhuluma namalungu ekomidi elibhekele ukusebenza kwezimali kuhulumeni.
I-SAA ifuna ukutakulwa ngoR10 billion kanti amalungu ekomidi elibhekele ukusebenza kwezimali, abuzile ukuthi kungani le nkampani ihlale itakulwa.
UButhelezi uthe kubalulekile ukuthi kutakulwe iSAA ngoba ngeke kube kuhle uma izwe lingasenawo amabhanoyi alo.
“Sezibe khona iziphakamiso zokuthi iSAA idayiselwe izinkampani ezizimele kodwa asihambisani nazo ngoba uMnyango wezeziMali awusoze uvume ukuthi izwe lingabi nenkampani yamabhanoyi,” kusho uButhelezi.
USihlalo weBhodi lakwaSAA, uNkk Dudu Myeni, uthe banezikweletu ezifinyelela kuR6.8 billion futhi uma betakulwa bazoyilandela yonke imiyalelo yephalamende njengoba benzile uma libacela ukuthi baqoke isikhulu esiphezulu.
“Isikhulu esiphezulu sizoqala ukusebenza ngoSepthemba kanti abantu esibakweletayo bavumile ukwandisa isikhathi. Isikhulu esiphezulu esizongena kwaSAA nguMnuz Vuyani Jarana, owazakhela udumo ngokuletha inzuzo kwaVodacom.”
USihlalo wekomidi elibhekele izimali kuhulumeni uMnuz Themba Godi, ubuzile ukuthi uma iSAA itakulwa ngoR8 billion izoshintsha kanjani indlela eziphethe ngayo. UNkk Myeni uthe badinga u-R13 billion.