Izikhalo ezigcawini ebezihlelwe elasePhalamende
UMPHAKATHI waseVryheid naseNewcastle ukhale ngamahhovisi ezomhlaba angayilandeli imithetho nokungashintshwa kwamakomiti ngesikhathi kunezigcawu zokubonisana ngomthetho-sisivinyo olawula amakomiti ohlongozwayo.
Izigcawu bezihlelwe yikomiti lasePhalamende lokuthuthukiswa komphakathi wasemakhaya nomhlaba.
Umthetho-sivivinyo, iCommunal Property Act elawula ukuthi kube namakomiti alawula umhlaba iCommunal Property Association (CPA’s), washaywa ngo-1996 manje usesigabeni sokuthi uphinde uchibiyelwe.
USihlalo wekomiti, uNkk Phumzile Ngwenya-Mabila, uthe izigcawu zokubonisana eziyishumi ababe nazo nomphakathi bechaza ngokuchibiyelwa kwalo mthetho umphakathi uyazithokozela kodwa abakubonayo yizikhalo eziningi ezibikwa ngumphakathi ukhala ngendlela amahhovisi alo mnyango angomahamba nendlwana asebenza ngayo uma enza amaCPA’s.
“Okuvelile wukuthi abaphethe amakomiti abayibizi imihlangano yokuchazela umphakathi ngokwenzekayo emapulazini, ukhetho lokushintshwa kwamakomiti kuthiwa alwenziwa ukuze kushintshe abaphathi futhi akucaciswa ngemibiko yenkohlakalo okuthiwa ikhona kula makomiti. Yize besizele ukuthi sihlomisane ngamaphuzu angase afakwe wumphakathi ngokuchibiyelwa komthetho kodwa asikwazi ukukuziba ukukhala komphakathi,” kusho uNkk Ngwenya-Mabila.
Phambilini kulo nyaka abahlala emapulazini eVaaihoek bakhala ngomnyango ngokuhlakaza ikomiti waletha umlawuli ozimele.