INanda Business Hub ifukula amabhizinisi
ASISEKHO isidingo sokuthi osomabhizinisi baseNanda baye enkabeni yeTheku uma befuna usizo lokuthuthukisa izinkampani zabo emuva kokuvulwa kweNanda Business Hub ngoJulayi.
Inanda Business Hub isungulwe ngonyaka odlule nguMnuz Sbongiseni Mbanjwa nabanye osomabhizinisi baseNanda ngenhloso yokusondeza amathuba kubantu akade bephoqeleka ukuya eThekwini uma befuna ukuthuthukisa izinkampani.
Uthe yize beyisungule ngonyaka odlule kodwa ibhaliswe ngokusemthethweni ngoJulayi kwazise phambilini osomabhizinisi bebesebenza ngabodwana.
“Ekuqaleni konyaka sikhethe ukuthi sihlanganeni sonke sisebenze emahhovisi aseMtshebheni ukuze nabantu basithole kalula. Izinkampani ezisungule Inanda Business Hub yi-Overture Projects okuyinkampani yonogada, Ami Trading Enterprise eyenza amawebsite nezokukhangisa, Eyoxolo Trading eyenza ucwaningo olusiza abazovula amabhizinisi, iYandisa koMbanjwa egxile kwezobuchwepheshe neMultiSkills Centre egxile kwezokushicilela,” kusho uMbanjwa.
Uthe Inanda Business Hub ihlanganisa osomabhizinisi abamnyama ukuze basizane njengoba kwenza osomabhizinisi bamaSulumane nabaseSomalia.
“Sisiza abantu ukuthi babhalise izinkampani, bazame amathuba, siphinde sibaxhumanise nezinkampani ezizimele nohulumeni. Uma inkampani ithola umsebenzi siyayisiza ukuthi ithole uxhaso lwezimali ukuze umnikazi wayo akwazi ukuyithuthukisa,” kusho uMbanjwa.
Uthe osomabhizinisi abangamalungu abo bakhokha kusukela ku-R200 ngenyanga ukuze bahlomule ngamathuba ebhizinisi.
“Sinezinhlelo ezihlukahlukene zokukhokhisa abantu kusukela koluka-R200 kuya koluka-R600, sihlanganisa osomabhizinisi abancane nezinkampani ezinkulu. Isibonelo nje, uma kunenkampani yokwakha eku-grade 7 ithola inkontileka, siyayicela ukuthi ithathe osomabhizinisi bethu abaku-grade 1 ukuze nabo bezokhula,” kusho uMbanjwa.
Ebuzwa ukuthi yimuphi umehluko phakathi kwabo nezinye izinhlangano ezihlanganisa osomabhizinisi, uthe bona abamyeki umuntu ukuthi azifunele amathuba kodwa bayamsiza bamgcwalisele amafomu adingekayo ukuthi asebenze.
“Umuntu siyamcathulisa kuze kube uthola umsebenzi futhi siqinisekise ukuthi uyawenza ngesikhathi okuvunyelwene ngaso. Osomabhizinisi bakhula ngemisebenzi abayenzayo. Yingakho simcathulisa umuntu kuze kube sekugcineni,” kusho uMbanjwa.
Uthe abagxilile kosomabhizinisi abanezinkampani kuphela kodwa bayababheka nabadayisi basemgwaqweni ukuze babasize ukuthi basuke ematafuleni bagcine sebesebenzela ezindaweni ezinkulu futhi sebebhalise izinkampani ezisemthethweni.
“Abadayisi basemgwaqweni sifuna bakhule, yingakho sibenzela ucwaningo lwezinto ezithengwayo ezindaweni zabo bese sibagqugquzela ukuthi bavule izinkampani. Ukuvula inkampani kuyasiza ukuthi umuntu ahlomule ngamathuba omnotho ngoba izinkampani ezinkulu zithanda ukusebenzisana nosomabhizinisi abancane abadinga ukuthuthukiswa amakhono,” kusho uMbanjwa.