Ake unwetshwe umgwaqo KwaXimba
MHLELI: Ngizwakalisa ubuhlungu ngenhlekelele eyenzeke KwaXimba okuthiwa kuse Number 9 edlule nemiphefumulo eminingi kangaka.
Le ndawo ayinawo amabhodi ayisexwayiso ngobungozi kubantu abasebenzisa lo mqwaqo. Mncane futhi awenele ezimotweni eziphambanayo kanti umazombezombe uyehlela kakhulu. Kukhona lapho ungeke ukwazi ukuphambana khona nezimoto ezinkulu lapho kuthi uma uzophambana neloli kumele ubuyele ecaleni ume ukuze ledlule.
Nalezi zimoto ezithutha umphakathi azenzelwanga indawo yokuma ephephile.
Uthi lo mgwaqo umncane unjalo nazo zime phakathi nawo ngoba akunandawo lapho zingama khona.
Usazobaqeda abantu lowa mgwaqo. Kuba nzima kakhulu-ke uma iziqhoboshi zingasasebenzi ngoba lokho kusho ukufa nje kuphela ngoba unamawa unjalo nje. Akukho zindawo lapho ungathi uma sewunalenkinga ingasabambeki imoto ukwazi ukuyikhiphela khona.
Siyawucela uMasipala wendawo usisize ngalesi simo ukwehlisa ubungozi balo mgwaqo.
Ibhuloho lomfula uMsunduzi lincane, kwedlula imoto eyodwa ngesikhathi kuyalindwana kube kunobungozi bezimoto ezingasalawuleki ngenxa yokwehlela kwawo nokungabambeki kwazo. Kuthi noma umshayeli ekwazile ukwehla aze afike kulona leli bhuloho inkinga iba khona uma kunezinye izimoto eziphakathi nalo. Lokho kwenza zitholane phezulu.
Siyacela lenkinga ilungiswe ngoba basazokufa abantu kuloyamgwaqo kanti ziningi nezimoto eziwusebenzisayo.
Ake kwenziwe imizamo yokuthi uvulwe ungabi mncane ngale ndlela ube wehlela futhi umajikojiko ngaloluhlobo. Nebhuloho lakhona alivulwe zikwazi izimoto ukuphambana ngokukhululeka kulo.
Umphakathi wakule ndawo akukho ongakwenza wona ngokwawo kodwa uhulumeni ongabasiza ukuthi kube yindlela ephephile ukuyisebenzisa.
Mhlampe abaholi bendawo okungamakhosi namakhansela bangakhuluma kuzwakale eMnyangweni wezokuThutha.