Bayizidudla ezizithandayo futhi ezizethembayo
UKUBA yizidudla akubavimbi abesifazane ukuba baphile impilo yabo ngendlela abayithandayo, baswenke bashaye ngisho nevosho.
Isolezwe likhulume nabesifazane abathathu, uNkk Mbali Khanyile, Nkk Ziphozonke Sikhahlane noNkk Nosipho Jadu abaphila impilo entofontofo, bayaziswenkela benze nemisebenzi eyahlukahlukene.
UNkk Khanyile waseMgungundlovu, ogqoka usayizi-46, uthe akukho angakwazi ukukwenza, futhi azikho izimpahla angazigqoki ngoba esaba umzimba wakhe.
“Ngazamukela ukuthi ngiyisidudla kodwa ngazitshela ukuthi ngimuhle, ngiphelele, akukho lapho ngishoda khona. Kusemqoka ukuba wazi umzimba wakho, uzazi nawe ukuthi ungumuntu onjani ukuze ukwazi ukuphila ngendlela oyithandayo.
Akukho lapho engingakwazi ukungena khona noma okuba nento engithi angikwazi ukuyenza ngenxa yomzimba wami,” kusho uNkk Khanyile.
UNkk Khanyile, ongumhlengikazi, uthe isikhathi esiningi izimpahla zakhe azigqokayo uyazithungisa noma athenge usayizi wakhe.
“Kusemqoka ukugqoka ngendlela uma wondlekile. Ngeke nje ungithole ngigqoke into emfushane ngoba ngiyazi ukuthi ngimkhulu. Angisithandi isidudla esingamahliphihliphi, kumele uhleleke, ufaneleke. Isicathulo esiphakeme kumele usijwayele ungahuduli umzimba noma ufake ophaqa ,” kusho uNkk Khanyile.
Uthe uthungelwa nguMnuz Sadi oseMgungundlovu.
UNkk Khanyile uthe uyazizulela nomnyeni wakhe, uMnuz Sthembiso Khanyile, badlale benze konke abakuthandayo. “Akukho engingathi angikwazi ukukwenza. Ngiyazimisela kukho konke futhi ngiyazithanda, ngiyisidudla.” UNkk Sikhahlane onenkampani yakhe iZawadi Communications, uthe ungusayizi 44 kodwa ukwazi ukugxuma abheke phezulu, ngisho nezemidlalo uyatholakala kuzo. “Ngihlezi ngizigqugquzela ngokuthi kulo mzimba kunomqondo okwazi ukwenza noma yini oyifunayo. Ngiyazithanda futhi kuyangijabulisa nje ukuthi ngiyisidudla, ngimnyama kodwa ngimuhle futhi ngihlakaniphile.” Isikhathi esiningi uyazithungisa izimpahla zakhe uNkk Sikhahlane ukuze athole into ezomfanela. Uthungelwa nguNksz Gemina Tloajoana athi useyawuqonda umzimba wakhe. UNkk Sikhahlane unezingane ezincane zabafana athi udlala nazo imidlalo ehlukene aphinde azidansele uma bengcebeleka. Isikhathi esiningi uba ngumphathi wohlelo emicimbini kanti naye uhlela imicimbi. Akasabi ukuma phambi kwabantu ngoba nakhu enomzimba omkhulu. “Uma ngikhuluma ngiqale ngibatshele ukuthi bangibukisise ngoba ngimkhulu futhi ngimuhle,” kusho uNkk Sikhahlane. UNkk Jadu waseThekwini ongusayizi 46 no-48, uthe yena ushaya ivosho kube ncane indawo. Ukuba yisidudla akumphazamisi nhlobo. “Ukuba yisidudla yikhona okungenza ngibe muhle kakhulu. Ngingena lapho kukhona izilenda kucace. Ngiyamodela futhi, kulabo abasuke bekhangisa izimpahla zabo. Ngiyazethemba ukuthi ngenele futhi akukho lapho ngishoda khona. Ngigqokela umzimba wami ngendlela.”