Uqokwe kowendondo ebalulekile kwezemfashini
OWESIFAZANE wakuleli uqokelwe ukuba ngowokuqala ukuthola indodo ethathwa njengebaluleke kakhulu emhlabeni kwezemfashini, iFashion 4 Development Franza Sozzani Award.
UDkt Precious Moloi-Motsepe uqokwe kugujwa iminyaka eyishumi yemfashini yase-Africa emhlabeni, i-African Fashion International Week (AFI) kuleli sonto.
Le ndondo ibizwa ngoNkk Franza Sozzani owayengumhleli we-Vogue Italia osewashona. Wayebambe iqhaza elikhulu ekuthuthukiseni imfashini ukuze ibe ngeyokuthuthukisa umnotho, futhi yenze ukuthi abasiki bengqephu bahlale belangazelele ukwenza okungaphezulu kwabake bakwenza.
UDkt Moloi-Motsepe uqokwe indodana kaNkk Sozzani, umnqondisi wamafilimu uFrancesco Carrozzini neNkosazana yaseNorway uMette-Marit ngeqhaza lakhe lokuhlanganisa nokugqugquzela abasiki bengqephu yaseAfrika nokuvula amathuba kwabesifazane abasafufusa kulo mkhakha.
Le ndodo izonikezwa uDkt Moloi-Motsepe emcimbini waminyaka yonke wamakhosikazi, owaziwa ngokuthi iFashion 4 Development Seventh Annual Official First Ladies Luncheon, ozobe useNew York City, ehhotela elinomlando, iPerre.
Lo mcimbi uzobe wenziwe umsunguli noMengameli weFashion 4 Development, u-Evie Evangelou noLivia Firth ongumqondisi we-Eco-Age.
Lo mcimbi uzobe uqondene nombukiso wamathalente wabasiki bengqephu e-Afrika.
Lo mcimbi uhlanganisa amakhosikazi omengameli baseUnited States, izingcithabuchopho, izitatanyiswa ezineqhaza kwezemfashini ezisuka emhlabeni wonke.
Kusuke kuzobungazwa ukusebenzisana kosomaqhinga nabezemfashini ngenhloso yokusiza abesifazane nezingane emhlabeni.
“Eminyakeni eyishumi eyedlule imfashini yase-Afrika ishintshile, ngiyajabula ukuthi kulolo shintsho kuneqhaza engilibambile ekugqugquzeleni ukuthi sithande umlando nemvelaphi yethu.
“Lokho sikukhombise ngobuchule bemfashini yethu. Ngiqale ngokuphendla indlela yokuthi imfashini yase-Afrika ikhonjiswe embukisweni esezingeni lomhlaba. Ngangifuna ukuveza ithalente lase-Afrika, ukwehluka kwalo, isitayela nakho konke ngalo,” kusho uDkt MoloiMotsepe.