USikhakhane akafuni ukuxhamazela neBay
AKAFUNI ukuzifakela ingcindezi yokudla isicoco amasizini amabili elandelana kwiNational First Division (NFD) umqeqeshi weRichards Bay FC, uRoger Sikhakhane.
Ngesizini edlule uSikhakhane udle isicoco seNFD neThanda Royal Zulu. Ubengaqali ukunyusela iqembu esigabeni esikhulu. Ngo2011/2012, wasiza iChippa United yadla ubhedu kuma-Play Off.
Ngempelasonto edlule iqembu lakhe lidlale ngokulingana ngo 1-1 neReal Kings eMhlathuze Sport Complex, eRichards Bay. I-Bay ashayela umkhumbi wayo ibophele ubisi lwabadlali okubalwa kubona uKhaya Shozi, Siphelele Mkhulise, Khulekani Madondo, Sandile Mthethwa, Manti Mekoa, Xolani Ngcobo, Sonke Ntuli, Veluyeke Zulu noPhilani Cele.
Yize ebophele ukhilimu uSikhakhane akafuni ukuzifakela ingcindezi yesicoco.
“Leli yiqembu elisha. Kusekhona izindawo ezisadinga ukuqiniswa. Angifuni ukubafakela ingcindezi abadlali. Ekuhambeni kwesikhathi bazohlangana. Seneme ngeqembu esilihlanganisile futhi asisazimisele ngokuletha obunye ubuso obusha. Iqembu esinalo lihle. Sidinga isikhathi bese sithola imiphumela,” kusho uSikhakhane.
Ngempelasonto iBay FC ilinyalelwe ngabadlali bayo abamqoka uMekoa noNjabulo Ngcobo bobabili okwadingeka ukuthi baphuthunyiswe esibhedlela ngemuva kokuthinteka.
“Iqembu esinalo yiqembu elihlukile kuneqembu ebesinalo ngesizini edlule. Kancane kancane sizofinyelela lapho esifuna ukuya khona ngemuva kwesikhathi. Sidinga ukubekezela imiphumela izoqhamuka,” kusho uSikhakhane.
NgoMgqibelo ngo-3 ntambama iRichards Bay FC izodudulana neCape Town All Stars e-Athlone Stadium, eKapa emdlalweni wesibili weligi.
“Okwamanje bengingakaze ngiwabone amanye amaqembu. Ngakho okwamanje angikwazi ukugaqela ukuthi umbango uzoba njani kwiNFD kule sizini. Ngemuva kwemidlalo engu10 kuzobe sekucaca ukuthi ngobani abayingozi. Ngicabanga ukuthi kuseva kakhulu ukuthi sengingakhuluma ngendaba yokunqoba iligi,” kusho uSikhakhane. Imidlalo yeNFD: Kusasa ngo-3 ntambama: Cape Town All Stars v Richards Bay (Athlone Stadium)
NgoMgqibelo ngo-3 ntambama: Royal Eagles v Highlands Park (Harry Gwala Stadium); Real Kings v Witbank Spurs (Sugar Ray Xulu Stadium); Stellenbosch v Uthongathi FC (Athlone Stadium); Super Eagles v Mbombela United (Goble Park)
NgeSonto ngo-3 ntambama: Black Leopards v Ubuntu Cape Town (Giyani Stadium); Mthatha Bucks v Tshakhuma Tsha Madzivhadila (Mthatha Stadium); Jomo Cosmos v Pretoria University FC (Olen Park)