Akumethusi okushiwo uPitso umgadli wePolokwane
AKAWASHAYI mkhuba amazwi omqeqeshi weMamelodi Sundowns umgadli wePolokwane City, uRodney Ramagalela, (osesithombeni) ocoboshise amaBrazilians emdlalweni we-Absa Premiership eLoftus Stadium, ePitoli, ngoLwesibili ebusuku.
URamagalela ushayele iRise And Shine amagoli amabili esiwombeni ngasinye kulo mdlalo abawunqobe ngo 2-1. IPolokwane ingelinye lamaqembu angakahlulwa emidlalweni yeligi emuva kwemidlalo emibili. Kowokuvula idlale ngokulingana ngo 0-0 nabakhaya iBaroka.
IRise And Shine, eqeqeshwa nguBernard Molekwa obeyimenenja yeqembu ngesizini edlule, igcine ihlulwe yiCape Town City ngo 1-0 koweMTN8 nokube wumkhonto ogwaze ekhaya.
Emuva komdlalo neSundowns, umqeqeshi uPitso Mosimane uncome uRamagalela ngegoli lakhe lesibili wathi sekubajwayele ukuhlinzwa ngabadlali ababedlala kubona nokusho ukuthi basuke befuna ukukhombisa ukuthi kwakungabafanele ukudedelwa yileli qembu. URamagalela wasayina kwiSundowns ngo-2013 esuka kwiBlack Leopards ehambisana noTiyani Mabunda noRaymond Monama. Nokho uphenduke ukudla kwebhentshi ngaphansi kobuholi bukaMosimane, wagcina eshiyile nyakenye emuva kokubolekiswa kwiLamontville Golden Arrows.
“Angikunaki nakancane okushiwo nguPitso. Ngiyazi uzitshela ukuthi abadlali abasuka kwiSundowns basuke bedlalela ukukhombisa ukuthi benza iphutha ngokubadedela. Mina akukho okufanele ngizitshengisele khona. Ngesizini edlule ngishaye amagoli sibhekene neKaizer Chiefs, Orlando Pirates neSuperSport United. Bonke abantu bayazi ukuthi uRamagalela uyalishaya igoli,” kusho uRamagalela.
“KwiSundowns angilitholanga ithuba ngoba bengihlushwa wukulimala. Kodwa ngifunde lukhulu kuyona ngendlela okufanele nginakekele ngayo umzimba wami. Angikhulelanga enkulisa ngakho izinto eziningi bengingazazi nokuyizinto engifike ngazifunda kwiSundowns. Manje ziyangisebenzela.”
Ngokushaya amagoli amabili, uRamagalela usephonse inselelo kwabanye abagadli ababhekiwe emjahweni weLesley Manyathela Golden Boot etholwa ekupheleni kwesizini. Ekuqaleni kwesizini edlule uRhulani Manzini weChippa United uyena oqale wavula igebe eshaya amagoli amathathu bebhekene neSuperSport. “Ngingajabula ukuwina umklomelo wamagoli kodwa angifuni ukuzifaka ingcindezi. Ngiyathanda ukushaya amagoli futhi kuyangijabulisa kodwa engikubeke phambili wukusiza iPolokwane iqede kwi-Top 8 ekupheleni kwesizini.”
IPolokwane izobuyela enkundleni ngoSepthemba 12 uma isibhekene neBloemfontein Celtic koweligi ePeter Mokaba Stadium, eLimpopo.