UMicho akeneme ‘ngobugwala’ beBucs
UMQEQESHI we-Orlando Pirates, uMilutin “Micho” Sredojevic, ukhale “ngobugwala” kubadlali bakhe bebanjwa yiBaroka ngo 1-1 emdlalweni we-Absa Premiership ePeter Mokaba Stadium, ePolokwabe, ngoLwesibili ebusuku.
IPirates ishaye igoli kuqala esiwombeni sokuqala nelibekwe enethini nguThabo Qalinge. Nokho iBaroka ibuyile esiwombeni sesibili yashaya elokulinganisa ngekhanda lika-Abdi Hassan Banda waseTanzania ongomunye wabadlali abasha kuleli qembu.
USredojevic, okhuza ibuya kwiPirates, ufike noshintsho ehlalisa ngaphandle inqwaba yabadlali abebezitamuzela isikimu eqenjini ngaphansi kwabaqeqeshi abahlukene ngesizini edlule okukhona kubona u-Ayanda Gcaba, Happy Jele, Issa Saar nabanye. Isikimu kulezi zinsuku zitholwa ngabadlali abebelizwa ngendaba ijezi okukhona kubona uGladwin Shitolo, Ntsikelelo Nyawuza, Qalinge nabanye. Nakuba iPirates ikhombisa ukuhlangana ngaphansi kukaSredojevic kodwa yena akenelisekanga ngokuthi bagcine bephume nephuzu emdlalweni weBaroka.
“Sidlale kahle kodwa umuzwa wabadlali wenze ukuthi bahlale emuva, sadlala phambi kwebhokisi lethu. Kwenzeke ikhona, ithuba elilodwa lokunganaki, sajeziswa. Esikhundleni sokuthi kube yithina esizuma izitha kodwa kade sekudlalwa lowo mdlalo wokuzumana esiwombeni sesibili. Iqembu elihamba phambili alikwazi ukuvumela lokho ukuthi kwenzeke. Bekufanele siqede ngabo. Kodwa kufanele siziqoqe, sisahlanganisa. Kufanele sicubungule, sibone ukuthi yikuphi lapho siphazame khona, lingene kanjani igoli nokuthi kungani sihlale emuva nalapho bekufanele simake ngokudlala ibhola sibheke phambili, sihlasele siqede ngabo.”
Kusukela kufike uMicho kwiPirates ayikahlulwa. Inamaphuzu amane emuva kwemidlalo emibili.
USredojevic unengcindezi yokubuyisa izinsuku zenjabulo kwiPirates esiqede amasizini amabili ngaphandle kwendebe.
Igcine ukuqukula indebe ngo2014 yeNedbank Cup.
Nakuba iningi likholwela wukuthi uMicho kusafanele azinze kahle ngaphambi kokulindela ukuthi awine imidlalo kodwa yena ubona kufanele baqoqe amaphuzu njengeqembu elikhulu.
“Ngikhiphe uQalinge ngoba uPunch ubezihambela, egoba amabhola kwesokunxele.
“Sifake uRakhale (Thabo) ngoba sifuna amnikeze umsebenzi. Sifake abadlali ababili abahlaselayo emuva kokungenelwa yigoli ngoba akwenele ukuthi iqembu elifana nePirates leneliswe yiphuzu. Siphonse konke ebesinakho ukuwina umdlalo kodwa asiphumelelanga.”
IPirates izobuyela enkundleni ngoSepthemba 12 uma seyamukela i-Ajax Cape Town kowePremiership e-Orlando Stadium, eSoweto.