Awanankinga ngobude bendlela amaBhokobhoko
UDOKOTELA weqembu lesizwe laseNingizimu Afrika lombhoxo, amaBhokobhoko, uKonrad von Hagen, akayiboni inkinga ngezinhlelo zabo zokuya eSalta lapho liyobhekana khona ne-Argentina emdlalweni weRugby Championship ngoMgqibelo ngo-9.40 ebusuku e-Estadio Padre Ernesto Martearena.
NgoMsombuluko iziphathimandla zamaBhokobhoko zilushintshile uhlelo lokuhamba zanquma ukuthi iqembu alihlale ePort Elizabeth liziqeqeshe. NgoLwesibili iqembu liye eGoli kwase kuthi izolo langena endizeni ebheke e-Argentina.
Uma iqembu selisuka eGoli lizofike lixhume edolobheni laseBrazil, iSau Paulo. Lifike kuleli dolobha laseBrazil khona izolo ebusuku lase lidlulela ekomkhulu lase-Argentina, iBuenos Aires. Okuvelile lapha wukuthi iqembu lize latheleka eSalta namuhla okusho ukuthi lizoziqeqesha namuhla nakusasa kuphela bese lidlala ngoMgqibelo.
Ngokubona kukaVon Hagen lokhu kuzokuba wusizo kubadlali ngoba isikhathi abasisebenzise ePort Elizabeth naseGoli beziqeqesha ngaphambi kokuhamba sizobasiza baphumule kangcono.
“Wuhambo olude impela ngoba sizohamba izinsuku ezimbili kodwa sisuke ekuseni. Sizofika ebusuku lapho siya khona. Lokhu kuzoba wolukhulu usizo kithina ngoba kuzovela nezikhathi ezincane ukuthi balale baphumule abadlali. Abanye bangakubona njengenkinga ukulala ebhanoyini kodwa akuyona. Okuhle wukuthi sizofika ebusuku abadlali bekhathazwe wuhambo baphinde balale bese bevuka ngakusasa siziqeqeshe,” kusho udokotela.
Khonamanjalo, iCell C Sharks iyabuyela kwiCurrie Cup kule mpelasonto ngomdlalo onzima neWerstern Province.
Kwezekhilikithi u-AB de Villiers umemezele ukuthi useyayeka ukuba ngukaputeni wamaProteas emidlalweni yosuku olulodwa izolo.
Isiyonke imidlalo ye-Absa Currie Cup imi kanje: Kusasa: Pumas vs Blue Bulls (Mbombela Stadium, 7pm). NgoMgqibelo: Western Province v Cell C Sharks (Newlands Stadium, 3pm); Free State Cheetahs v Golden Lions (Toyota Stadium, 7.15pm).