ObekwiChiefs ulandelwa amashwa
ULANDELWA amashwa umgadli ochithwe yiKaizer Chiefs, u-Edward Manqele, ozama inhlanhla kwiFree State Stars.
UManqele uchithwe yiChiefs ngasekupheleni kwesizini edlule ngemuva kokuhlala isikhathi eside ekhuhla ibhentshi. Umqeqeshi weFree State Stars, uSammy Troughton, utshele abezindaba ngemuva komdlalo wezakhe naMaZulu eKing Zwelithini Stadium, eMlaza, ukuthi kungani bengakasithathi isinqumo ngekusasa likaManqele.
“Sizobona ukuthi sizomsayinisa yini noma cha. Ezinsukwini eziyishumi ezedlule uthintekile. Ubengajimi. Sizophinde simhlole ukuthi akakalulami yini. Sizimisele ngokumnika ithuba. Ukube akazange alimale ngabe sesisithathile isinqumo sokuthi sizomsayinisa noma cha,” kusho uThroughton.
UManqele ubemiswe kabi nguBernard Parker noGustavo Paez kuMakhosi ngesizini edlule. Abanye abagadli abebanga nabo ijezi nguSiphelele Mthembu osanda kusayiniswa yiFree State, uLewis Macha osegijima kwiBaroka FC, Camaldine Abraw ozama inhlanhla kwiWits noMichelle Katsvairo oseyibamba eTanzania.
Njengamanje Amakhosi asele noParker, Paez noRyan Moon. IFree State ibivika izembe ngesizini edlule. Leli qembu lisanda kubuyisa uSello Jaftha. Ekuqaleni kwesizini edlule bamdayisele iPirates.
KweZimnyama ufike wakhuhla ibhentshi okuholele ekutheni achithwe ekupheleni kwesizini.
“UJaftha usalele emuva kakhulu kwabanye abadlali. Kuyabonakala ukuthi kade agcina ukudlala. Kusamele asebenze kanzima ukuze abonakale. Ejimini ukhombisa izimpawu zokuthi kukhona okuhle azosinika kona uma esesimweni esihle. Ukhaliphile, inkinga wukuthi kuyabonakala ukuthi kade agcina ukudlala,” kusho uThroughton.
KwiPirates Jaftha uhluleke wancama ukubeka uThabo Rakhale, Thabo Qalinge, Thembinkosi Lorch, Mpho Makola, Riyaad Norodien, Luvuyo Memela noMahlatshe Makudubela, ebhentshini. UThroughton ebuzwa ukuthi uthini umbandela awubekelwe yizikhulu zeqembu uthe: “Awukho umbandela oqondile engibekelwe wona. Into esizama ukuyiqinisekisa wukuthi asibalwa namaqembu avika izembe. Akuwona umuzwa omnandi ukuvika izembe okuyinto iqembu ebelilokhu libhekana nayo kula masizini edlule. Besinethemba lokuthi sizoqala kahle kodwa ngebhadi akuzange kwenzeke.”
Ngesizini edlule iFree State yayidayiswa kodwa kwabheda ekugcineni njengoba abantu ababefuna ukuyithenga bagcina behlulekile wukuletha imali ngesikhathi.