Umdlwenguli ugwetshwe odilikajele abawu-10 neminyaka ewu-202
UGWETSHWE odilikajele abawu10 neminyaka ewu-202 edonsa ejele umdlwenguli obesehlalise lubhojozi abesifazane eBergville, Ematsheni naseLadysmith.
UThokozani Joseph Kubheka (34) ulahlwe ngamacala awu-34 okukhona kuwo awu-16 okudlwengula, ayisishiyagalolunye okugqekeza, ayisikhombisa okubamba inkunzi kuhlonyiwe namabili okuthumba abantu.
Uzodonsa iminyaka ewu-452 ejele ngoba udilikajele owodwa uyiminyaka ewu-25.
Ukhomishana wamaphoyisa KwaZulu-Natal, uMajor General Bheki Langa, ukushayele izandla ukugwetshwa kukaKubheka wathi umphakathi usuzophepha njengoba esevalelwe ejele.
Uveze ukuthi uKubheka uqale ukuhlalisa lubhojozi umphakathi ngo-2009 edlwengula abesifazane eBergville, Ematsheni, eRoosboom naseLadysmith.
Uthe ubecuthela abesifazane lapho behlala khona abheke ukuthi bahlala nobani bese kuthi labo abahlala bodwa agqekeze imizi yabo ezintatha abadlwengule.
Ubebakhomba ngesibhamu, antshontshe impahla yabo aphinde abadlwengule.
“Isikhathi esiningi abantu abadlwengulile bebengakwazi ukumbona ngenxa yokuthi ubebahlasela ebusuku nasentathakusa. Uboshwe ekuqaleni konyaka wuphiko olubhekelele udlame emndenini, amacala ezingane nawocansi oluseLadysmith,” kusho uLanga.
Uthe ugwetshwe odlikajele abawu-10 ngokudlwengula, ewu105 ngokubamba inkunzi, ewu-72 ngokugqekeza nokweba bese kuba ewu-10 ngokuthumba.
Khonamanjalo, omunye umdlwenguli, uSbahle Shange (27) ugwetshwe iminyaka ewu-10 ngokudlwengula nokuthumba intombazane eneminyaka eyisithupha.
UShange ugwetshwe yiMantshi yeNkantolo yaseMlaza ngoLwesithathu ngokudlwengula ngoJuni 12 nyakenye.
Wabamba ingane iphuma kovakashela unina wayithatha ngenkani, wayivalela endlini yakhe wayidlwengula. Durban Durban