Kusolwa umona ngokufa kwekhansela
OKUHLABAHLOSILE okuqukethwe yiphephandaba Isolezwe ngoMgqibelo ELAWINI LIKAMAGUMEDE
Kuleli sonto uMaGumede nodaba ngendlela abesifazane abagqoka ngayo athi ibehlisa nesithunzi emadodeni
Akulona icala ukuzithokozisa ngocansi ngawedwana, kodwa uma usukwenza ungasakwazi ukwenza ezinye izinto, usuhlala ucabanga kona, usunenkinga EZOKUNGCEBELEKA
Kushubile kumlingisi osatshiswayo INDLELA YOKUPHILA
Kunabesifazane abangasasabi ukusho ukuthi ngenxa yezizathu ezithile, bakhethe ukukhipha emaphakatheni abo bazilobole bona EZEMIDLALO
UNGAPHUTHELWA ezithinta ukuvalwa kwewindi labadlali be-Absa Premiership
UMBIKO othinta umdlalo weCape Verde neBafana Bafana.
IZIKHULU zeSafa zithulela isigqoko iKZN ngokukhiqiza abadlali abanohlonze
KUSOLWA umona nombango wesikhundla ngokubulawa kwekhansela laseMkhambathini elidutshulwe wumuntu okuthiwa ubesemhlanganweni we-ANC.
UMnuz Kwazikwakhe “Khansela Lodumo” Mkhize (36) udutshulwe ngoLwesithathu ebusuku ephuma ehholo lomphakathi lapho bekunomhlangano wegatsha kudingidwa ukuthi ikomiti le-ward lizoqokwa kanjani ngoba belingakaqokwa.
UMkhize kuthiwa uhlaselwe kusagcwele abantu abebesemhlanganweni. Omdubulile uqhamuke ngemuva kwakhe wamdubula esiphundu wabaleka.
Omdubulile kuthiwa uke wabonakala esebantwini abebesehholo lomphakathi kodwa ngumuntu ongaziwa endaweni.
Umufi kuvele ukuthi bekukhona abangajabule ngomsebenzi wakhe wokuletha intuthuko ngokushesha ku-ward 3.
I-ward kuthiwa yintsha kanti ihlanganisa amapulazi, indawo yasemakhaya nedolobha.
Isolezwe lihoshe umoya wokuthi kukhona ababegaqele ukubekwa njengamakhansela kule ward. Abanye kuthiwa bebengafihli ukuthi bangenza kangcono kunomufi uma benikwa isikhundla.
Umthombo weSolezwe osondelene nalolu daba uthe umona nokuhawukela isikhundla sakhe yikhona abasola ukuthi kuholele ekubulaweni kukamufi.
Ngesikhathi Isolezwe lihambele umndeni, unina kamufi, uNkk Thandazile Mkhize, ukhihle isililo wathi: “Baze bangibulala ngiphila abantu ngokubulala indodana yami isencane kangaka. Inkosi ibabusise ababulali abadubule ingane yami, ngizwe izibhamu ziqhuma ngisendlini. Baze bangenza abantu.”
OMnuz Sipho Mkhize ongumfowabo omdala kamufi noNtokozo Ndlovu, ongumlamu kamufi abebenaye ebuholini ku-ward 3, bathe bashaqekile ngoba umufi ubengenazo izitha. “Asiyazi imbangela yokubulawa kwakhe ngoba ubengumuntu othanda umsebenzi wakhe eyithanda nenhlangano ye-ANC. Ubengenazo izitha. Sifuna amaphoyisa abophe abasolwa ukuze bachaze ukuthi kungani bembulele,” kusho uMkhize. UNdlovu uthe abaningi babengakholwa ukuthi umufi angaqokelwa ukuba yikhansela kodwa imisebenzi yakhe emihle iyona eyagqama emphakathini wagcina ekhethwe yiningi. “Kumanje kunomtholampilo obuzokwakhiwa nemigwaqo ngenxa yokusebenza kukaMkhize. Baningi abantu abatholele imisebenzi. Ushona nje ubezihambela ngezinyawo kodwa ubehamba engena umuzi nomuzi esiza abantu,” kusho uNdlovu. Unobhala we-ANC esifundazweni, uMnuz Super Zuma, uthe bakhathazekile kakhulu ngokudutshulwa kwamakhansela abo. THUMELA umbono ngalolu daba kuFacebook (Isolezwe), kuTwitter (@isolezwenews) noma umqhafazo ku-45773. I-sms ibiza R1,50.
“Ukudutshulwa kwamakhansela ethu kuqale ngaphambi kokhetho lwezindawo, kwaqhubeka noma sebekhethiwe ngo-Agasti ngonyaka odlule. Sifuna kube nesisombululo, kutholakale ukuthi ubani lona obulala amakhansela ethu futhi kwenziwa yini lokhu,” kusho uZuma.
UBrigadier Hangwani Mulaudzi okhulumela amaphoyisa kuzwelonke uthe bajube ithimba elizophenya ngokubulawa kwekhansela.
“Kunabaphenyi bethimba eliphenya ngokubulawa kosopolitiki eliphenyayo. Imbangela yokubulawa kwakhe ayaziwa, uphenyo luyaqhubeka,” kusho uMulaudzi.