Bazoba senkingeni abakhwabanisela iSassa
BAZOWUKHOMBA umuzi onotshwala abakhwabanisela isikhungo esiholela izimpesheni, iSassa, KwaZuluNatal.
Lokhu kushiwo yibamba lomphathi kwaSassa esifundazweni, uMnuz Sibusiso Nhlangothi.
UNhlangothi, odabuka eSweetwaters, eMgungundlovu, uthe zintathu izinto azogxila kuzo njengoba engene esikhundleni.
Ukukhwabanisa nenkohlakalo, ukulungisa izifunda zeSassa zifane nezomasipala nokwehlisa izikweletu.
Ezweni lonke, iSassa ikweletwa imali engaphezudlwana kuka-R1 billion , kule mali u-R600 million yisikweletu saseKZN.
Lesi sikweletu sadaleka ngenxa yokuholelwa kwezipoki. Kanti kuthe uma iSassa isibabambile labo abebeholela izipoki kwatholakala ukuthi ngeke bakwazi ukuyikhokha le mali. Isikweletu sinyuswa nawukuthi abantu banyuse imali okusuke kufanele umuntu ayihole njengokuthi esikhundleni sokuthi ingane ihole u-R380 wesibonelelo kodwa ihole u-R3 800 ngenyanga.
UNhlangothi uthe iKZN iholela abantu abaningi impesheni, okwenza ukuthi noma ngubani ofuna ukuzokwenza ubugebengu eze kuso. Ukuba semngceleni wamazwe amathathu – Swaziland, Lesotho, neMozambique – uthe kuholela ekutheni nabantu abaphuma kula mazwe bangene kuleli bahole ngomgunyathi.
Kuthiwa ngezinsuku zokuhola, abanye bayabonakala bewela umngcele bezohola bese bebuyela emazweni abo.
“Lapha ngaphakathi iKwaZuluNatal isondelene nezifundazwe ezintathu okuyiMpumalanga, Eastern Cape neGauteng. Abantu bakulezi zifundazwe abanye babo bakhetha ukuzobhalisa kulesi sifundazwe,” kusho uNhlangothi.
Uthe emalini ewu-R11 billion eholelwa abahola isibonelelo sikahulumeni ngenyanga, u-R2.6 billion uholwa ngabaseKZN.
Okwamanje uthe izifunda zeSassa zine kanti omasipala bezifunda bawu-11 uma kuhlanganiswa neTheku.
“Kumele sehlise imali engena ebhukwini lezikweletu edalwa wukuthi kuholelwa abantu imali engaphezulu kwaleyo okumele bayihole. Uma sekutholakele ukuthi kube nephutha noma kube nomkhonyovu owenziwe yisisebenzi seSassa sihlangene nalowo ohola impesheni, uyehluleka obehola ukukhokha le mali bese ingena ebhukwini lezikweletu.”
UNhlangothi ubengumphathi wophiko oluholela izimpesheni kuzwelonke ngaphambi kokuthatha lesi sikhundla ekuqaleni kwenyanga.
Ngaphambi kwalokhu ubenguMqondisi weSassa, eKapa.
“Kungekudala uphenyo luzofinyelela esiphethweni kuvele ukuthi ngobani abenza inkohlakalo. Ubuchwepheshe buyaveza ukuthi ngubani obebhalisa umuntu ohole imali engaphezulu. Leso sisebenzi kumele sibhekane nengalo yomthetho.”