I-ANCWL ayinavalo ngesinqumo
UPHIKO lwabesifazane lwe-ANC KwaZulu-Natal luthi alunankinga noma inkantolo inganquma ukuthi ingqungquthela yesifundazwe yango2015 eyayiseMgungundlovu iqalwe phansi ngoba alunavalo ngobuholi obukhona.
Unobhala walolu phiko uNksz Nonhlanhla Gabela, uthe labo abahlulwa ezingqungqutheleni kumele bakwamukele ukuphathwa abawinile bangajahi ukuya ezinkantolo ngoba befuna kuxazululwe izikhalo zabo.
Uthe uma ungenela umbango kusuke kunezinto ezimbili, ukunqoba noma ukukhala ngaphansi.
“Abantu abahluliwe abamukele ukuthi i-ANC iyona ephethe. Isigungu esiphezulu se-ANC sagcoba ubuholi obukhona sathi abuqhubeke nomsebenzi wokuhola abantu. Ngiyaxakeka uma sekukhona abaya ezinkantolo, ekubeni engqungqutheleni bayamukela imiphumela. Ngangiyingxenye yabantu ababebala amavoti kule ngqungquthela, yonke into yahamba kahle,” kusho uNksz Gabela.
Ukusho lokhu izolo ekhuluma esithangamini nabezindaba njengoba namhlanje kuqala ingqungquthela yokukhetha ubuholi esePlayhouse, eThekwini.
Uhlangothi olwahlu-lwa engqungqutheleni yango-2015 olwaluholwa nguMnuz Senzo Mchunu luyise uhlangothi lukaMnuz Sihle Zikalala enkantolo lukhala ngokuthi izinto azihambanga kahle. Kulindwe isinqumo senkantolo ngalolu daba.
UNksz Gabela uthe bafuna uDkt Nkosazana Dlamini Zuma abe ngumengameli olandelayo we-ANC ngoDisemba.
“Sikhathazekile ngokuthi kukhona abangakhulumi ngamava kaDkt Nkosazana Zuma kodwa bakhuluma ngokuthi ungowakwaZuma. Akancikile kowesilisa ngoba wangena emncane emzabalazweni. Sekuyisikhathi sabantu besifazane ukuthi baphathe izwe ngoba uma ubheka amalungu e-ANC ayisigidi, u-800 000 wawo abantu besifazane,” kusho uNksz Gabela.
Uthe akhona amanye amagama abesifazane aphakanyiswa ukuthi babe sembangweni wezikhundla eziphezulu.
“ElikaSomlomo wePhalamende uBaleka Mbete (Nksz), elikaNosiviwe Mapisa-Nqakula (Nkk) nelikaMaite Nkoana Mashabane (Nkk). I-ANC inenqwaba yabantu besifazane abanamava,” kusho uNksz Gabela.
Umengameli we-ANCWL , uNksz Bathabile Dlamini nguyena ozovula le ngqungquthela kusasa bese ngeSonto uDkt Dlamini Zuma akhulume ngezinto ezithita izinguquko kwezomnotho ngaphambi kokuba ivalwe.