AbaseThekwini bakhala ngomphathi
BAFUNA kuxoshwe umphathi abamsola ngokuba undlovukayiphikiswa, abafundi baseThekwini TVET College abebenesithangami nabezindaba eThekwini, izolo.
Leli kolishi elinezikhungo ezine eThekwini, sekunezinyanga ezine lavalwa ngemva kokuthi abafundi bevuke umbhejazane. Abafundi bafuna kukhokhelwe imali yokugibela kulabo abangenayo indawo yokuhlala ezindaweni zokuhlala ezihlelelwe abafundi bakuleli kolishi. Le mali kuthiwa ikhokhwa yisikhwama esibhekelele ukuxhasa abafundi iNational Student Financial Aid Scheme (NSFAS), abakhala ngokuthi igcina ingafinyeleli kubona.
Abafundi basola umphathi wekolishi uMnuz Eugene Mchunu ngokuthi usebenzisa ngendlela ayithandayo imali ephuma ku-NSFAS, angabaniki incazelo eqondile ngokusebenza kwayo.
UMgcinimafa we-SRC kulesi sikhungo uLebohang Diradingoe, uthe ukuvalwa kwesikhungo isikhathi eside, sekwenze abafundi basilela emuva kakhulu ezifundweni zabo.
“Besingavunyelwe ukuba semagunjini okufundela izinyanga ezine ezedlule. Kubukeka sengathi sisazoqhubeka nokuhlala emakhaya ezinye izinyanga ezilandelayo. Lokhu kuyasikhathaza ngoba kuzoholela ekutheni sifeyile bese kuba yinkinga yethu ngoba uNSFAS uzothi usikhokhelile imali yokufunda neyokugibela ukuze size esikoleni,” kusho uDiradingoe.
Uthe bathole ukuthi uNSFAS ukhokhe u-R12 million, ikolishi laveza ukuthi lithenge izincwadi ngo-R8.4 million, kwathi uR3.6 million kwathiwa owezindawo zokuhlala. Uthe ayikho imali ebekelwe ukugibela kwabafundi. Kuvele ukuthi abafundi baphinde bakhishwa ezindaweni abahlala kuzo ese-Asherville neseSydenham ngesonto eledlule.
Imizamo yokuthola uMchunu ayiphumelelanga njengoba ucingo lwakhe belukhala lungaphendulwa nemiyalezo athunyelelwe yona akayiphendulanga.