UZuma uphendule imibuzo ePhalamende
UMENGAMELI Jacob Zuma uthi akakaze ahlale emhlanganweni acele abantu ukuth basize indodana yakhe.
UZuma usho lokhu ngesikhathi ekhuluma namalungu ePhalamende, ephendula imibuzo izolo.
Umholi we-DA uMnuz Mmusi Maimane ubuze ukuthi, ngabe uMengameli uzomthathela yini izinyathelo uMnuz Brent Simons onguMqondisi woMnyango weziSebenzi zikaHulumeni nokuPhatha njengoba ebhale incwadi efungelwe esola uMengameli ngokucela abasebenzi balo mnyango ukuthi basize umndeni wakhe.
“Angikaze ngihlale emhlanganweni oyalela abantu ukuthi basize uDuduzane,” kusho uZuma.
Amalungu eDA awothe ubomvu efuna uMengameli aphendule ngenkani kodwa ubelokhu emile kwelokuthi akakaze ahambele umhlangano.
Amalungu e-EFF athe njengoba uMengameli engafuni ukuphendula imibuzo, akufanele kumoshwe izinsiza zasePhalamende nemali yabakhokhi bentela kulokhu kulalelwa yena esho into engekho.
Umholi we-EFF, uMnuz Julius Malema ubuzile ukuthi kungani uMengameli engabathatheli izinyathelo zomthetho abenza izinsolo ezimbi ngaye.
UMengameli uphendule wathi: “Angibathatheli izinyathelo zomthetho abantu abanjengawe.”
Uthe uphezu kwezinhlelo zokusungula ikhomishini ezophenya ngokusetshenziswa kombuso yidlanzana.
Ebuzwa ukuthi iNingizimu Afrika izohlomula ngani ngokuphatha izinhlelo zeBrics neze-G20, uZuma uthe bazokhuluma ngamathuba omnotho azohlomulisa abantu bakuleli.
Ebuzwa ukuthi ngabe kukhona usomabhizinisi waseRussia owamcela ukuthi aqoke uMnuz Silas Zimu njengomeluleki wakhe ukuze ezothatha izinqumo ezivuna i-Russia, uZuma uthe wazithathela yena leso sinqumo.Uziphikile izinsolo zokuthi abatshalimali abasalibheki elakuleli, esho nokuthi akusikhona ukuthi uma kushintshwa ungqongqoshe wezeziMali umnotho uyawa kodwa uwiswa yizinto eziningi ezenzeka emhlabeni jikelele.
Akazange acasuke uma ilungu le-EFF uNkk Hlengiwe Hlophe lithi iSAA ihlale ifuna ukutakulwa njengoba uSihlalo webhodi kuyintombi yakhe, esho uNkk Dudu Myeni.
“Awukwazi ukugxeka abantu ngesimo esenzeka kwaSAA.. Sinezinhlelo zokulungisa isimo,” kusho uZuma.
Uthe akanazo izinhlelo zokuxosha uNksz Faith Muthambi osolwa ngokumosha izinto kwaSABC. Mayelana nodaba lokunikwa ushwele kukaNkk Grace Mugabe, uZuma uthe akayena ummeli.