I-Cosatu izobhunga ngesiphakamiso sikaGigaba
IHLUKENE phakathi iCosatu ngesiphakamiso sikaNgqongqoshe wezeziMali, uMnuz Malusi Gigaba, othe kufanele kusetshenziswe impesheni yabasebenzi bakahulumeni ukutakula iSouth African Airways (SAA).
UMengameli weCosatu uMnuz Sdumo Dlamini utshele izintatheli zase-Independent Newspapers ukuthi uGigaba wenze lesi siphakamiso emhlanganweni wezinsuku ezintathu weCosatu obuseGoli kuleli sonto.
“Ungqongqoshe (Gigaba) uthe babheka izinhlelo eziningi zokutakula iSAA nezinye izinkampani zikahulumeni ezidinga ukutakulwa. Ubale nodaba lokusebenzisa imali yempesheni yabasebenzi bakahulumeni ekwiPublic Investment Corporation.”
“Besingakavumelani ngokuthi siyameseka ungqongqoshe noma cha. Sisadinga ukuxoxisana ngalolu hlelo,” kusho uDlamini.
Iphini likaDlamini, uMnuz Tyotyo James, nePhini likaNobhala Jikelele weCosatu, uMnuz Solly Phetoe, bathe abavumelani nalesi siphakamiso.
“ISAA yinkampani egcwele inkohlakalo, asikwazi ukumosha impesheni yabasebenzi. Kumele babheke ezinye izindlela zokulungisa isimo eSAA, sizoxoxisana noMalusi (Gigaba),” basho kanje.
UNobhala Jikelele weCosatu uMnuz Bheki Ntshalintshali uthe baphinde bathola umbiko ngesimo somnotho nezinhlelo zokuwuthuthukisa. Uthe bazoxoxa kabanzi ngeziphakamiso zikaGigaba.
Mayelana nokuzimela kweSACP okhethweni luka-2019, uthe bazoba nomhlangano neSACP ukuze bakhulume ngezindaba ezibathinta bonke.
“Siyawagqugquzela amalungu ethu, ukuthi axoxe kabanzi ngodaba lokuzimela kweSACP okhethweni luka-2019. Sizophinde siluxoxe lolu daba engqungqutheleni ezoba ngoSephtemba wonyaka ozayo,” kusho uNtshalintshali. Iphini likamengameli weCosatu lesibili, uNksz Zingiswa Losi obegqoke isikibha esiphakamisa iPhini likaMengameli we-ANC ukuthi lithathe ubuholi ngonyaka ozayo, uthe ngeke bangaluxoxi udaba lokuzimela kweSACP.
Uthe bazoba nesiteleka ngoSepthemba 27 sokulwa nenkohlakalo, ukulawulwa kombuso yidlanzana nokulahleka kwamathuba emisebenzi.