Ucele izinhlanhla ethuneni leNkosi uLuthuli
OWAYENGUSIHLALO we-AU Commission, uDkt Nkosazana Dlamini Zuma, ucele izinhlanhla ethuneni lowayenguMengameli we-ANC, iNkosi Albert Luthuli njengoba eqala umkhankaso wokuphatha i-ANC.
Ngaphambi kokubeka izimbali ethuneni, uDkt Dlamini Zuma uqale waba nomkhuleko nebandla, i-United Congregational Church of Southern Africa, wabusiswa ngumdikoni uBlessing Mthethwa othe bamkhulekele ukuthi anqobe ukhetho.
Uphinde waba yisikhulumi sosuku emcimbini wokuvala inyanga yabesifazane obuKwaDukuza ngaphambi kokuthi kuvulwe ukuqokwa kwabazongenela ukhetho lwe-ANC oluzoba ngoDisemba eGoli.
Yize uDkt Dlamini Zuma ethe uzoqala umkhankaso wakhe namhlanje, umuntu omphathele umkhankaso uMnuz Carl Niehaus uthe baye ethuneni ngoba befuna izibusiso.
“Njengom-Afrika ubone kubalulekile ukuthi azocela izibusiso kwiNkosi Luthuli ngoba ngumholi owayezibophezele kwi-ANC. Elwela namalungelo abantu,” kusho uNiehaus.
UDkt Dlamini Zuma ubhekene nezingqinamba ezinzima njengoba kukhona abaseka iPhini likaMengameli uMnuz Cyril Ramaphosa ukuthi angene esikhundleni sikaMengameli Jacob Zuma.
Idikoni Mthethwa utshele uDkt Dlamini Zuma ukuthi ibandla liyameseka futhi lifuna aqhubeke nezinhlelo zeNkosi uLuthuli zokwakha iNingizimu Afrika ebumbene futhi ethuthukayo ngokomnotho.
“Mama (Dkt Dlamini Zuma) uzoba nguMengameli uma usisiza ukuthi sakhe inyuvesi. Sizokuthandazisa ukuthi izinhlelo zakho ziphumelele,” kusho uMthethwa.
IMeya yaKwaDukuza, uMnuz Ricardo Mthembu, ithe i-ANC izoshintsha izwe iqinisekise ukuthi bonke abantu bayathuthukiswa kwezomnotho.
UDkt Dlamini Zuma ugqugquzele intsha nabesifazane ukuthi bathuthukise umnotho futhi bayeke ukuphuza utshwala ngokweqile.
“IYouth League kufanele ihambe phambili emkhankasweni wokulwa nokuphuzwa kotshwala ngokweqile. Intsha kumele ingabuphuzi utshwala,” kusho uDkt Dlamini Zuma.