Umsebenzi wakhe wukuphekela inxusa lase-USA
UMPHEKI ophekela inxusa lase-United States of America eliseThekwini ukholwa wukuthi ukuziphatha kahle emsebenzini yikho okumcabele indlela yokuqashwa kulo msebenzi.
UMnuz Sandile Ngcobo waseNewtown A, eNanda, ongumpheki aphinde abe yimenenja yomuzi ohlala inxusa lase-USA, uthe akazange akholwe ngesikhathi ethola ucingo lumazisa ukuthi kunomsebenzi ehhovisi okubonakala sengathi angawenza kangcono. Uqale kulo msebenzi ngo-2008. “Ukusebenzela inxusa kwakungeyona into engangicabanga ukuthi ingenzeka. Ngajabula kakhulu uma ngithola ucingo. Angizange ngicabange kaningi ngavumela phezulu,” kusho uNgcobo.
Ngaleso sikhathi uthe wayengumsizi wompheki waseShidzidzi and Nungubane Lodge eseWelgevonden Game Reserve eLimpopo.
Ngaphambi kwalokho uthe wayekade engumsizi wompheki wasemkhunjini.
“Ngangivele sengifisa ukubuya ngizosebenza ekhaya kodwa ngangingafuni ukubuyela emahhotela, ngenhlanhla kwaqhamuka leli thuba,” kusho uNgcobo.
UNgcobo ufunde iCatering Management eML Sultan esibizwa ngeDurban University of Technology (DUT), ngo-2000.
Uthando lokupheka uthe lwamngena ngesikhathi esebenza ebhikawozi eqashelwe ukuhlanza.
“Ngangisebenzela ukuthi ngithole imali yokubhalisa esikhungweni semfundo ephakeme. Ngezikhathi zasemini kwakubuye kwenzeke kushode abantu ababhakayo. Angiyena umuntu olesabayo ibhodwe, ekhaya bengivele ngipheka uma usisi ethi ukhathele noma efuna ukuthi simshintshe. Ekhaya singabafana abane intombazane iyodwa. Ngakuthanda ukubhaka ngangena kulo mkhakha ukuze ngithuthukise ikhono lami.”
Ukuphekela izicukuthwane ezivakashela ehhovisi uthe akulula ngoba kuyenzeka zonke izicukuthwane zibe nezinto ezithile ezidinga ukuphekelwa zona.
“Ngisho kungathiwa izivakashi zinhlanu uma bezodla ukudla okwehlukene kuba nzima. Kumele lokho kudla okuphekile wenze isiqiniseko sokuthi ngeke kusiphathe kabi esinye isicukuthwane noma kungathiwa ngeke kudliwe yiso.”
Uthe abantu abangayidli inyama yengulube babanokuphatheka kabi uma bebona ukuthi ekhishini obubaphekela kulo ubuye wapheka inyama yengulube.
Okunye okuyinselelo yizindlela zokudla ezintsha ezifana ne-banting athi kumele uziqonde kahle ngoba zehlukene kaningi.