Isikhalo ngokwenziwe owezeMfundo eKZN
NAKUBA kuhlale kunesikhalo ngokushoda konogada ezikoleni zaKwaZulu-Natal kodwa uMnyango wezeMfundo usebenzise imali engaphansi kwebihleliwe yokuqasha onogada, omabhalane, abaluleka ngezifundo, abahloli nabanye abasebenzi.
Umnyango uhlulekile wukusebenzisa u-R22.639 million okuyinto edalulwe emhlanganweni wekomiti lezimali esiShayamthetho sesifundazwe eMgungundlovu kuleli sonto.
Izinyunyana zothisha ezihlale zikhala ngokuqashwa kwabasebenzi sezisabise ngokumashela umnyango zikhala ngokuthi izikhulu zawo ziyahluleka ukwenza umsebenzi.
UNobhala weSadtu esifundazweni, uNksz Nomarashiya Caluza, uthe bazomasha kule nyanga ngoba sebekhathele ukukhuluma into eyodwa yokuqashwa kwabasebenzi.
Uthe bahlale bekhala ngokushoda konogada njengoba iningi labo likhokhelwa abazali ekubeni imali yabo ikhona wathi othisha nabafundi abaphephile.
“Sesinqume ukuthi simashe sizwakalise ukungenami kwethu ngezinto ezenzeka emnyangweni. Abahloli abaqashiwe, amakilasi agcwele kodwa kunemali ebuyela emuva,” kusho uNksz Caluza.
UMnuz Allen Thompson, iphini likamengameli weNatu, uthe kunezikhala ezingu-10 000 ezingavaliwe emnyangweni kodwa imali ibuyiselwa emuva.
Uthe izikhulu zomnyango zithatha imali ziyiyise kwezinye izinhlelo ukuze zizizuzise zona.
“Kumele kuphenywe ngezinhlelo lapho kweqiswe khona imali, uzobona ukuthi yilapho izikhulu zihlomula khona ngokuthi kwezinye izinhlelo zisebenzise imali encane. Kuyacaca ukuthi uDlungwane (uNgqongqoshe wezeMfundo KwaZulu-Natal) akazi ukuthi kumele enzeni emnyangweni. Sihlale sikhala ngokungaqashwa konogada ezikoleni kodwa umnyango uyibuyisela emuva imali yokubaqasha,” kusho uThompson.
Uthe umnyango unqwahe nemisebenzi kodwa baningi abantu okungabe baqashiwe ikakhulu onogada.
Okhulumela umnyango, uMnuz Sihle Mlotshwa, uthe izikhala okungaqashwanga kuzona akuzona ezothisha kodwa ezabanye abasebenzi.
Uthe inkinga kube wukuthi umnyango ubuzohlulwa wukubakhokhela abasebenzi eminyakeni ezayo.
“Uma uqasha umuntu kumele umhlelele ukuthi eminyakeni ezayo uzomkhokhela ngani. Yingakho singakwazanga ukuqasha abasebenzi ngoba bekuzosihlula ukubakhokhela ngomuso ngenxa yesabelo sezimali,” kusho uMlotshwa.