Kunzima kogqenywe ngesando
USESIMENI esibucayi esibhedlela owesilisa waseGreytown othi ushawe ngesando ekhanda wase ehlaliswa isikhathi eside esibhedlela iGreytown enganakiwe.
Umndeni kaMnuz Siyabonga Bongani Gasa (34) ukhala ngokuthi akahlolwanga ukuthi ulimale kangakanani ekhanda ngesikhathi engeniswa esibhedlela.
Udadewabo uNksz Thule Gasa uthe umfowabo uphuthunyiswe esibhedlela ngoMgqibelo ekuseni emuva kokulimala kanzima ekhanda.
Uthe balinde kwaze kwaba yiSonto anduba ahlolwe ekhanda nokuyilapho okutholakale ukuthi ulimele kakhulu.
“Sifike esibhedlela bamhlola base bemlalisa. Abazange bamyise ukuyohlolwa ekhanda. Ngesikhathi sengizombheka ngeSonto ngimfice engasakwazi ukukhuluma kahle esesesimeni esingesihle. Ngithe uma ngibuza ukuthi udokotela useke wambona yini kwathiwa ugcine izolo ukumbona ngoba odokotela abekho esibhedlela. Ngize ngathinta umphathi wesibhedlela ngamcela ukuthi asisize ukuze athathwe isithombe kubhekwe ukuthi ulimele kangakanani ekhanda. Umphathi wesibhedlela ungibuze ukuthi ngenza msebenzi muni, ngiwunesi noma udokotela yini. Ngibe sengimtshela ukuthi kungcono ukube uyasibona isimo akusona ubhuti wami,” kusho uNksz Gasa.
Uthe umphathi wesibhedlela ugcine ethumele esinye isikhulu sasesibhedlela wathi asizokhuluma naye. Ngokusho kwakhe lesi sikhulu sifike sasibona isimo sikaGasa sazama ukumehlisa umoya kodwa wanqaba ukugoduka engakadluliselwa kwesinye isibhedlela.
Uthe lesi sikhulu sibize omunye udokotela obekwelinye iwadi, naye othe akathathwe amagazi bese imiphumela ithunyelwa esibhedlela iGrey’s eMgungundlovu. UGasa kuthiwa uphuthunyiswe eGrey’s wafike wahlolwa ekhanda nge-scanner kwatholakala ukuthi uchofoke ithambo elisekhanda nokuthi wophela ngaphakathi.
Udadewabo uthe udokotela waseGrey’s ubathethisile ebabuza ukuthi ubehlaleleni sonke lesi sikhathi engalethwa esibhedlela. Bathe uma bemchazela wabatshela ukuthi isibhedlela saseGreytown senze iphutha ngokuhlala naye ngoba lokhu kungenzeka kwenze ingqondo yakhe ingaphinde isebenze kahle noma ashone. Udokotela umdlulisele esibhedlela iNkosi Albert Luthuli Central nokuyilapho ahlinzwe khona ngoMsombuluko.
Okhulumela uMnyango wezeMpilo KwaZulu-Natal, uMnuz Sam Mkhwanazi uthe uma kuyimpelasonto kuba nodokotela abathathu abasuke belindele ukubizwa ukuze bezosebenza kulesi sikhungo.
Uthe nezinhlelo zokuthathwa kwezithombe zisuke zisebenza. UMkhwanazi uthe zizophenywa izinsolo ezibekwayo eziphambene nalokhu.
Okhulumela amaphoyisa KwaZulu-Natal, uCaptain Nqobile Gwala ukuqinisekisile ukuthi amaphoyisa ayaphenya ngokuhlaselwa kukaGasa, bekungakaboshwa muntu.