UZuma usewutholile umbiko
UMENGAMELI Jacob Zuma usewutholile umbiko wekhomishini ephenya ngemfundo yamahhala kumanje umatasa uyawufunda.
Lokhu kushiwo ngokhulumela uMengameli uDkt Bongani Ngqulunga njengoba uSihlalo wale khomishini uJaji Jonathan Heher enike uZuma lo mbiko emzini wakhe oseKapa, iGenadendal.
“UMengameli Zuma uzowufunda lo mbiko nezincomo zawo bese ewudedelela umphakathi,” kusho uNgqulunga.
UZuma wasungula le khomishini ngoJanuwari 2016 ngenhloso yokuthi yenze uphenyo lwayo ezinyangeni eziyisishagalombili iqokiwe.
“Kodwa ngemuva kwezinye izichibiyelo ezintweni ezaziphenywa yabe isilulelwa isikhathi ukuthi iphothule umsebenzi wayo ngaphambi kukaJuni 30, nonyaka. UMengameli ubonga uSihlalo wale khomishini ngomsebenzi awenzile.”
Engqungqutheleni yenqubomgomo ye-ANC eNasrec, eGoli uphiko lwentsha lwe-ANC lwathi lukhathele izethembiso ngale mfundo seluyifuna ngokushesha.
Lolu phiko lwathi lufuna le mfundo iqale ngonyaka ozayo uma kuvulwa izikhungo ngoJanuwari.
UMengameli walo, uMnuz Collen Maine, watshela Isolezwe ukuthi sebekhathele ukulinda umnyama ongenafu ngemfundo yamahhala.
“Sifuna imfundo yamahhala qha manje. Asisafuni ukulokhu sitshelwa lokhu nalokhu,” kwasho uMaine.
Nenhlangano emele imikhandlu yabafundi emanyuvesi iSouth African Union of Students yathi ifuna le mfundo, yasabisa ngokuthi uma kungenzeki lokhu iziteleka zabafundi zizoqala phansi.
UZuma wajuba ikhomishini ngemuva kwemibhikisho yabafundi emanyuvesi ahlukene akuleli ababefuna kufakwe le mfundo ngokushesha.