Ubuholi be-ANC eKZN abubumbe lo mbutho
MHLELI: Akusiyo indlela ejwayelekile nesakhuliswa ngayo kwi-ANC ukuba ilungu nelungu lizwakalise umbono walo ngokwenzeka enhlanganweni kwabezindaba.
Kuba lukhuni satshe ukuthi, nakuba usuyenze yonke imizamo, ulandela inqubo mgomo yale nhlangano ukuba uzwakalise umbono wakho, kepha ungakutholi ukwamukeleka, zikhathi zonke. Ubuholi esinabo manje abunaso isikhathi sokulalela nokubonisana namalungu enhlangano, ikakhulukazi kulawo asuke kade ehola phambilini.
Inhlonipho nokubekezelelana kubukeka kushabalala. Kanti empeleni uma ungumholi uyathobeka, uvuleleke emalungwini, abakukhetha nabangakukhethanga. Empeleni uyazenzela ukuba abantu bakuhloniphe babone ubuholi kuwe.
Amalungu namhlanje aseze ancame ukuya ezinkantolo noma kwabezindaba ukuze alalelwe athole nokuvikeleka kumalungelo awo, ngokoMthetho-sisekelo we-ANC ukuba abe nombono ngokuqhubekayo enhlanganweni. Ubuholi kulesi sifundazwe bugxile ezinkantolo kanti empeleni akekho ozozuza kula macala, noma isinqumo singavuna bani. Izinkinga esifundazweni zingexazululwe isinqumo samaJaji futhi ngeke sixazululwe ukuhlakazwa kobuholi emazingeni angezansi.
Ngobuningi bezifunda osekuhlakazwe ubuholi bazo, nalezo ezisasele, kepha kubonakala kahle ukuthi vele nazo kumele ngabe kade bahlakazwa ubuholi kuzona. Uma kunezinkinga ezingaka ezifundeni nakomaspala, sihlulwa mihla le okhethweni lokuchibiyela, kubulawe abaholi, uqhekeko luvele lube sobala. Kunjengoba kade luziveza enkantolo eMgungundlovu, ngempela ubuholi bethu kulesi sifundazwe bumele buzinuke amakhwapha.
Ubuholi bungeke bazigqaja buzishaye isifuba buthi konke kusalungile.Kungalezi zizathu singephele amandla, ukuhlezi sibunxusa ubuholi ukuba mabenze umehluko. Kanti yini lena ekumele ize yenzeke, noma okumele aze afe naye ukuze izinto zisukunyelwe zithathelwe phezulu? Ngempela obani laba abazuzayo, bahlomule ngalo monakalo, osuze waba ngaka ikakhulu kulesi sifundazwe?
Kuyimanje ubuholi obuphezulu (NEC) sebugunyaze amagatsha ukuba axoxisane ngobuholi obuzophakanyiswa, axoxe nangenqubo mgomo ye-ANC ezochitshiyelwa engqungqutheleni yangoDisemba. Kepha konke lokhu akubonakali kwenzeka, kuhlelwa nayizakhiwo ezifundeni. Kunalokho lezi zakhiwo zigxile kokunye esingakwazi. Waze wafa umbutho sibhekile, singenamandla okwenza lutho ngoba abanye bayesatshiswa kunjalo nje.
Ngifisa ukuphonsa inselelo kuwo wonke amalungu e-ANC ukuba kulezi zinsuku ezimbalwa ezisele ngaphambi kokuqalisa kohlelo lokukhetha abazongenela izikhundla kuzwelonke, oluqala ngoSepthemba, ukuba sihlanganeni, singadikibali futhi singapheli amandla. Izinkinga ze-ANC ziyolungiswa yithina malungu ayo uma ubuholi busadidekile.
Ukujikijela esivivaneni, nanka amaphuzu ambalwa okungaxoxelwa kuwo:
Kungabe ngempela njengesifundazwe siyahluleka ukuvumelana ngegama elilodwa kozongenela isikhundla sikaMengameli phakathi kukaDkt Nkosazana Dlamini Zuma noMnuz Cyril Ramaphosa?
Uma sehluleka, kungani futhi sehlulwa yini, kuyisixazululo na ukwehlukana? Uma sivumelana, yebo kuhle kepha silenzenjani igama lomunye wabo?
Kungabe sisakhumbula ngombono esake saba nawo phambilini ngegama likaDkt Zweli Mkhize?
Ukhona yini na kithi ongaba nenkinga uma simphakamisa njengephini likaMengameli?
Kungebe na umbono omuhle ukuba uMnuz Senzo Mchunu noMnuz Sihle Zikalala ke baphiwe ithuba lokusebenza ndawonye futhi ukuze balungise lo monakalo owenzeke embuthweni emagameni abo, silande noMnuz Bheki Cele noMnuz Mike Mabuyakhulu ukuba azobalekelela.
La maphuzu angasebenza njengeziphakamiso, singafaka nokunye inqobo nje uma lokho kungenza umehluko enkingeni esibhekene nayo futhi kusihlanganise. Namaqembu aphikisayo awazibekile phansi, afuna ukusihlwitha umbuso owatholwa kanzima ngezithukuthuku negazi lezingqalabutho zethu ngenxa nje yobudedengu namaphutha ethu. Ngempela umbuso sesingawudedela ufe kalula kanjalo. Empeleni sidingana kakhulu namuhla kunakuqala.