UDJ Le Soul usephumela ngaphandle kwakuleli ngomculo wakhe
USESABALALA nangaphandle kwaseNingizimu Afrika uDJ waseThekwini, uDJ Le Soul, ozokhipha i-albhamu yakhe yokuqala ngenyanga ezayo.
ULe Soul, ophinde abe ngumsakazi weGagasi FM, ukusho lokhu ngesikhathi ethula i-albhamu yakhe kwaSMG, eMhlanga, ngoLwesithathu ebusuku.
I-SMG ibalwa kubaxhasi bakhe njengoba epepenyeka ngezimoto zakhona.
Utshele izethameli ukuthi njengoba esenenkululeko yokuhamba ngempelasonto, kwazise uhlelo alwenzayo lungena ngo-12 kuya ku-3 emini phakathi nesonto, usezobonakala ezindaweni eziningi.
“Ngihlela uchungechunge lwemicimbi ezindaweni eziningi, ikakhulukazi ngaphandle kwaseNingizimu Afrika. Ngiqalile ngempelasonto edlule njengoba ngihambele eNamibia naseZambia. Emasontweni amathathu ezayo ngiyahamba futhi. Ngihlele ukuya e-UK (United Kingdom) naseUSA (United States of America),” kusho uLe Soul.
Uthe abantu ahlele nabo lolu hambo lwakhe ngabantu asazane nabo iminyaka.
“Ngabantu engibaze kudala kodwa bengingafuni ukuthi ngivele ngihambe ngoba bengingakakulungeli. IGagasi selikhululekile manje ngoba uyakwazi ukusakazela noma yikuphi lapho ukhona. Nimzwile noDiva Kadach eseLA (Los Angeles),” kuchaza uLe Soul. UDiva Kadach, ubehambe noSomizi Mhlongo kumaMTV Video Music Awards njengoba kunguye omphaqulayo ebusweni. Kwi-albhamu yakhe ezobizwa ngeUnorthodox Sounds usebenze nabantu abaningi okubalwa kubo uTribal, DJ Butter nabanye. “Kuncane ukuthi uthole uDJ wesifazane ozibambele mathupha emsebenzini wakhe. Abantu banikezwa i-albhamu isiphelele kuthiwa abayiphushe bengazi nokuthi izingoma zenziwe ngubani. “Mina ngidlala upiyano. Ngaqala ngineminyaka engu14, ngiwumculi futhi ngiwumdidiyeli. “Yize igqom’ isematheni kodwa umculo esiwenzile wumculo ozoba mnandi nangomuso,” kusho uLe Soul. Emcimbini wakhe kunandise uPolo B futhi uhlelo beluphethwe ngusomahlaya, uFlaimotion osho isimo somgwaqo ohlelweni alwethulayo iMidday Madness. Bekukhona noFelix Hlophe abethula naye lolu hlelo, umculi uMasandi, okhulumela iGagasi FM uKhulekani Shandu nabanye.