Zincane izinguquko kwabalalela imisakazo ezweni
IZIBALO zakamuva zokulalelwa kwemisakazo ezikhishwe yiBroadcast Research Council of SA (BRC) ziveza ukuthi zincane izinguquko ezibalweni zabalaleli bemisakazo.
Izibalo ezikhishwe yiBRC ekupheleni kuka-Agasti ngezaphakathi kukaJanuwari noJuni nonyaka. Ngokwezibalo, Ukhozi FM lwehle ngabalaleli abangu-26 000. Phambilini belunabalaleli abawu-7 600 000 kanti manje sebengu-7 574 000.
IMetro FM ngakolunye uhlangothi yona izuze abalaleli abawu-37 000 nokuyenze yasuka ku-4 007 000 yafinyelela ku-4 044 000.
Iziteshi ezizinze eMhlanga iVuma FM, Gagasi FM ne-East Coast Radio zikhulile. IVuma izuze abawu-10 000 njengoba ibinabalaleli abangu-44 000 kanti manje sebengu-54 000. IGagasi lona likhule lisuka ku-1 327 000 lafika ku-1 397 000. I-East Coast Radio yona isuke ku-1 010 000 kanti manje isiku-1 101 000.
UMhlobo Wenene ulahlekelwe njengoba usunabalaleli abangu-5 422 000 besuka ku-5 501 000.
Eziteshini zomphakathi zaKwaZulu-Natal, Izwi LoMzansi lisazohola phambili yize lilahlekelwe ngabalaleli njengoba sebengu-118 000 besuka ku-126 000.
INongoma FM inabalaleli abangu-80 000 kuthi iHighway Radio yona ibe nabangu-70 000.
Izibalo ezilandelayo zizophuma ngoNovemba okuyizo ezizocacisa kahle ukuthi izinguquko ezenziwe yimisakazo zibe namuphi umithelela esibalweni sabalaleli.
Khonamanjalo, umdlalo osakhonjiswe iziqephu ezimbili iTjovitjo sekuvele ukuthi uqophe umlando kwaSABC 1, njengoba ibukwe abantu abangaphezu kuka 5.7 million, esiqeshini sokuqala.
UVincent Moloi uthe, kwakungelula ukuqopha umdlalo kodwa bajabule ngokuvela kwalezi zibalo.