Kukhalwa nxa zonke ngoMgebisa
SIKHULU isililo ngokudlula emhlabeni koqweqwe lwentatheli yezemidlalo, uMzimasi Mgebisa.
Abaningi bazomkhumbula ngokuhlaziya ibhola ezinhlelweni zemidlalo ku-SABC1.
UMgebisa ushonele esibhedlela iCharlotte Maxeke Johannesburg Academic, eGoli ngoLwesibili ekuseni enenkinga yezinso.
Ekhuluma nelinye iphephandaba unkosikazi kaMgebisa, u-Asanda, uthe umyeni wakhe ubesezinhlungwini futhi kunzima nasempilweni.
“Ubekhala ngezinso nokuvuvukala kwezinyawo. Ubelokhu engena ephuma esibhedlela kusukela ngo-Ephreli. Kodwa kuqale ukuba kubi ngoJulayi.
“Ushonele esibhedlela iCharlotte Maxeke Johannesburg Academic Hospital,’’ kusho u-Asanda.
USimnikiwe Xabanisa osebenze isikhathi eside noMgebisa, umchaze njengomuntu obenemibono eminingi.
“UMgebisa ngimaze kusukela ngonyaka ka-2000 ngifika eGoli. Ubeyindoda ebinemibono eminingi futhi enesiphiwo. Ubewumlandeli omkhulu webhola futhi ekuthanda nokufunda kwazise ubekhonze izincwadi ezibhalwe wuSimon Cooper,’’ kusho uXabanisa.
Nenhlangano ephethe ibhola eNingizimu Afrika, iSouth African Football Association (Safa) idlulise amazwi enduduzo emndenini kaMgebisa.
UNgqongqoshe wezeMidlalo uMnuz Thulas Nxesi noMengameli weSafa uDanny Jordaan, bazwakalise ukushaqeka ngokushona kukaMgebisa.
“Lezi yizindaba ezibuhlungu kwezebhola. Ukudlula emhlabeni komuntu obenethalente eliyisimanga ngempela kusilimazile.
“Izwe lisabadinga abantu abanethalente ngoba isemkhulu imicimbi esazoba khona nokuzodingeka ukuthi kube khona abantu abazodlulisa umyalezo kuqhakanjiswe leyo midlalo yebhola,’’ kusho uNxesi.
UJordaan uthe izwe lilahlekelwe ngokudlula emhlabeni kukaMgebisa.
“Ubalwa nezintatheli zezemidlalo ezimbalwa ebeziliqonda kahle ibhola. Ubengagcini ngokuhlaziya ibhola kuphela kodwa ubezinikele kulo mdlalo.
Umufi usebenzile ephephandabeni iSunday Times, SABC nakwa-e.tv.
U-Asanda ukuqinisekisile ukuthi uMgebisa uzofihlwa ngoLwesihlanu oluzayo, ngoSepthemba 8, eGoli.
Kulabo abafihla izihlobo zabo ngale mpelasonto, sengathi uNkulunkulu engabasingatha kulesi sikhathi esinzima.
Asihlangane ekhasini lethu likaFacebook: Isolezwe Ezemingcwabo