Ubemnene obeqecija kwiChiefs
IGUTSHEZELWE yifu elimnyama iKaizer Chiefs ngemuva kokudlula emhlabeni kobengumqeqeshi wonozinti, u-Alexandre Revoredo, ngemuva kokugula isikhashana.
IChiefs evelelwa yilo mshophi ivele izinto aziyihambeli kahle nasenkundleni, iqinisekise lezi zindaba izolo ekuseni.
Esitatimendeni esikhishwe yiqembu kuvele ukuthi uRevoredo (58) odabuka eBrazil uphuthunyiswe esibhedlela ngeSonto ekhala ngezinhlungu esiswini. “Ngeshwa isimo siye saba bucayi kakhulu ngoLwesibili, washona ngoLwesithathu ekuseni phezu kwemizamo ebiyenziwa,” kusho isitatimende.
IChiefs ithe izobuye ikhiphe imininingwane ngenkonzo yesikhumbuzo nomngcwabo.
Lo mqeqeshi ufike kwiChiefs ekuqaleni kwesizini edlule. Ngaphambi kwalokho ubeyibambe komakhelwane bayo i-Orlando Pirates lapho esebenze kakhulu noMoeneeb Josephs noSenzo Meyiwa naye ongasekho emhlabeni.
Ngesikhathi iPirates iwola izicoco, uJosephs wabonga uRevoredo ngamagalelo akhe ngemuva kokuthi lo nozinti ethole umklomelo wonozinti ovelele kwiTelkom Knockout ngo-2011.
“Sonke kwi-Orlando Pirates Football Club sidlulisa amazwi enduduzo emndenini kaRevoredo. Sifisa uNkulunkulu aniduduze ngalesi sikhathi sobuhlungu. U-Alex ubeyindonda ewuthandayo umsebenzi wayo, obekuhlezi kuhlekwa lapho ekhona,” kusho isitatimende sePirates.
Nenhlangano eyengamele ibhola kuleli iSouth African Football Association (Safa) ayisalanga ngaphandle nayo ikhalisana nomndeni.
URevoredo kuvele ukuthi ushiye unkosikazi wakhe uDeise otheleke kuleli izolo ekuseni.
Abadlali nabo kubathintile ukushona kukamqeqeshi. UTsepo Masilela no-Itumeleng Khune beChiefs ngabanye abakhalile ezinkundleni zokuxhumana.
“Umoya wakho ulale ngokuthula #Beleza. Ngiyabonga ngongenzele khona. Ngizokukumbula,” kusho uKhune.
URevoredo uke wasebenza naqenjini laKwaZulu-Natal, iLamontville Golden Arrows, afike kuyona evela eBrazil.
“Sikhalisana neKaizer Chiefs nomndeni kaRevoredo. U-Alexandre ubengumuntu onenhliziyo emnene futhi obehlezi emamatheka,” kusho i-Arrows ekhasini layo kwi-twitter.