Kungani iCSA ibona uGibson engaguqula isimo samaProteas?
UBANI u-Ottis Gibson? Kungani kunguyena iCricket South Africa (CSA) ibona ukuthi uzokwazi ukuguqula isimo samaProteas?
Kusukela iCSA imemezele uGibson emchaze njengowaseWest Indies yathi uyena ozongena esikhundleni okuphuma kuso uRussell Domingo, angikaze ngikuthole ukuphumula ngoba kunombuzo olokhu unkeneneze njalo ezindlebeni zami Ubani u-Ottis Gibson?
Kungenzeka ukuthi ukulandela ikhilikithi noma amaProteas ngikugibele isitafu wena owabona abafana bengena esitimeleni sesihamba?
Nakuba kunjalo kodwa eminyakeni engu-12 ngibhala ezemidlalo ezinhlakeni ezahlukene, angikaze ngihlangane negama elithi Ottis Gibson. Angisengi ezimithiyo kodwa futhi ngiyaqonda kungenzeka ukuthi yimi ebenginganaki. Uma umuntu eke waqala wakhuluma ngeWest Indies kimina amagama afika kuqala awoBrian Lara, Courtly Walsh, Malcolm Marshall, Sir Viv Richards, Jimmy Adams, Shivnarine Chanderpaul noCurtly Ambrose. Elika-Ottis Gibson angilazi nakwamadala eJuteni.
Kungani iCSA ibone kungcono ukuqasha owangaphandle? Uma kungukuthi bekuphoqa ukuthi baqashe owangaphandle kungani beqoke lo olidlalele kabili kuphela izwe lakhe kuma-Test, wadlala amahlandla angu-15 emidlalweni yosuku olulodwa?
Yikuphi lokhu osekuke kwenziwa wu-Ottis Gibson esengumqeqeshi okwenze iCSA yabona kunguyena ovelele kubona bonke abebefake izicelo zalo msebenzi?
Ngiyazi ukuthi bakhona abaqeqeshi beqophelo eliphezulu abebefake izicelo kodwa bachithwa. Ngobani? Yini le enhle noma eyisipesheli kangaka ngoGibson? Uma ngiwubuyisa kahle umqondo ngike ngambona lo muntu (uGibson) ekhuluma kwithelevishini kodwa ubegqoke umfaniswano weqembu lesizwe lase-England. Nakhona angizange nginake kodwa ngiyakhumbula ukuthi ngibonile ukuthi uqeqesha abashwibi be-England.
Igama lakhe kodwa angizange ngilithole kwaze kwaba uLwesithathu lapho iCSA imemezele khona ukuthi amaProteas asenomqeqeshi omusha.
Ngesikhathi ngizwa lokhu kuvele kwafika igama likaGeoffrey Toyana weHighveld Lions. Okwenze ngimcabange wukuthi ngiyazi sike sakhuluma naye emasontweni edlule wakucacisa ukuthi usifakile isicelo futhi usebiziwe kwinhlolokhono.
Ake ngikutshele ngoToyana kancane. Yile ndoda esiwine zonke izicoco ezikhona eNingizimu Afrika kwikhilikithi kusukela ifikile kuleli qembu laseGoli eminyakeni emihlanu edlule. Yiyo futhi le ndoda ehlale imamatheka. UKagiso Rabada okukhulunywa ngaye umhlaba wonke, Temba Bavuma, Quinton de Kock, Eddie Leie no-Aaron Phangiso bonke abayizinsika zamaProteas, baphume esandleni sakhe uToyana.
Okungixaka kakhulu futhi ukuthi lo mqeqeshi oqashiwe ugxile kakhulu kubashwibi. Kungani iCSA ikuziba okwenziwa uMakhaya Ntini nabashwibi beqembu lesizwe laseZimbabwe? Uma ucabanga nje, ubani angamuzwa kangcono uRabada phakathi kukaNtini noGibson? Abaqeqeshi abafana noPaul Adams, Mark Boucher, Lance Klusener nabanye kungani benganikwanga lo msebenzi.
AmaProteas agila izimanga uma kuyimidlalo engathi shu kodwa emiqhudelwani ye-international Cricket Council (ICC) enza le nto yawo okuthiwa uku-choker. Imbangela yalokhu ukuhlala endleleni endala yokudlala kanti ikhilikithi isishintshile. Kulapho kungena khona uToyana. Indlela iLions ezidla ngayo izicoco ihluke kakhulu kweyamaProteas.
Uma bebefuna indlela ehlukile yokudlala besingekho isidingo sokulanda umuntu ongenawo amangwevu atheni kwezokuqeqesha bashiye ababo asebezidlile izicoco njengoToyana noma uLance Klusener.
Kusemqoka nokho ukuthi umqeqeshi omusha aqale kahle futhi asheshe asifake isitayela sakhe kubadlali. Unenhlanhlake nokho uGibson ngoba umdlalo osele kulo nyaka uwodwa kuphela futhi kudlalwa neBangladesh ngenyanga ezayo. Nakuba kunjalo kodwa le nhlanhla izophela onyakeni omusha ngoba kuzomele abhekane ne-India ne-Australia okuyilapho kuzobe sekufanele aveze amangwevu akhe.
Sizohlala Phansi Emgodini silinde ukubona ukuthi uzokwazi yini ukusiyekisa uku-choker emiqhudelwaneni ye-ICC.