I-VW ne-crossover entsha iT-ROC

UKUBA yintandokazi kwezimoto eziphakeme kwenze ukuthi abakwaVolkswagen nabo baqhamuka nenye ngenhloso yokudoba abathange kulesi sigaba.

Imoto yabo iT-Roc iyi-compact crossover futhi ingaphansi kuneTourag neTiguan.

Le SUV encane abaningi ngesikhathi bebona izithombe zayo bayifanise ne-Audi Q2 ngendlela ebukeka ngayo.

USihlalo weBhodi lakwaVolkswagen uDkt Herbert Diess, uthe iphethe zonke izinto izinhle zezimoto zakwaVW njengokubambelela nobuchwepheshe.

IT-Roc izoba yiSUV yokuqala kule nkampani ukufika nemibala emibili njengokuthi emzimbeni ibe womunye umbala kuthi okhakhayini ibe nomunye.

Ihlala abagibeli abahlanu futhi ibhuthi layo lingu-445 litres. Uma ulalise izihlalo zangemuva liba ngu-1 290 litres.

Iphuma neCity Emergency Braking nePedestrian Monitor esiza ukuthi igweme ukushayisa abantu, iyazigcina ukuthi ingaphumi emzileni nokunye.

Ngasezinjinini izotholakala ngezintathu zikaphethroli iTSI nezintathu zikadizili iTDI. Izobe idonsa ngamasondo angaphambili no-gearbox ozishintshayo futhi uma ithanda kukhona edonsa ngawo womane i-4Motion ne-dual clutch gearbox (7-speed DSG).

E-Europe izoqala ukutholakala ngoNovemba ngemali elinganiselwa ku- 20,000 (R312 000). ENingizimu Afrika nokho akukaqinisekiswa ukuthi izotheleka nini. Sizokwazisa uma imininingwane ephelele isikhona.