Abakwa-Isuzu kabayi ndawo
IMOTO: KB 250 X-Rider 4x2 Double Cab
NGESIKHATHI iGeneral Motors (GM) imemezela ukuthi isiyashiya ekusebenzeni eNingizimu Afrika kwashaqeka abaningi.
Ezimnandi kodwa kubathandi bamaveni akwa-Isuzu Truck South Africa (Pty) Limited wukuthi le nkampani yathi izothenga amasheya kwaGM ukuze iqhubeke nokusebenza eNingizimu Afrika.
Yathi ifuna ukuqhubeka nokukhiqiza i-Isuzu KB.
Esinye isizathu sokuqhubeka nokusebenza wukuthi i-Isuzu KB ingenye yamaveni enza kahle kakhulu emakethe kuleli ikakhulukazi njengoba abathengi benezinhlobo ezahlukene abangakhetha kuzo.
Enye inhlobo yalawo ma-Isuzu KB eyenza kahle, yiKB 250 X-Rider 4x2 Double Cab.
Le moto ike yaba khona emagaraji ngonyaka odlule kodwa ngaleso sikhathi yayingeyekhethelo kwazise zazingu-700 kuphela ezazidayisa.
Ukuthandwa ngabathengi yikho okwenze abakwa-Isuzu bayibuyisa.
Enye into eyenza ukuthi ibe yintandokazi kubathengi wukuthi iyaheha ngaphandle. Uyabona nje ukuthi yiveni ongahamba ngalo nsuku zonke akukhona ukuthi yimoto ongayikhipha uma ufuna ukuvakashela emakhaya noma ukuyoqwala izintaba ngempelasonto.
Inyathela ngamasondo anamarimu angu-18 inch phakathi nendawo abhalwe u-Isuzu, phambili ine-bumper guard emnyama celeni base beyifaka ama-fog lights, izitebhisi zimnyama kanjalo ne-sports bar sase siqoshwa uX-Rider.
Ngemuva ine-tow bar. Imibala yayo ihlukene kathathu okungoSummit White, Switchblade Silver, okuwumbala wengiyivivnyile noPull Me Over Red.
Ngaphakathi inezihlalo zesikhumba nesiteringi kanjalo nesiteringi sesikhumba.
Izihlalo zinezitishi ezibomvu bese kuthi lapho ubeka khona ikhanda zibe noX-Rider.
Isiteringi sinamabhathini okulawula umsakazo noma ukuphendula iselula kwazise ixhunywa nge-Bluetooth.
Ngaphansi kwebhonethi inenjini engu-2.5 litre enamandla angu-100 kW netorque engu-320Nm. Le njini ine-turbo lag encane eyenza ukuthi ingasuki ngamandla kodwa uma isisemgwaqeni iwubukhosi ngoba iyashesha.
Okungenza kungabi mnandi ukuhamba ngayo edolobheni wukuthi kuzomele uhlale unemali eshintshekile ozoyipha abaqaphi bezimoto uma upaka. Lokhu kungenxa yokuthi ayinawo amasensor ngakho ukuze ungabi senkingeni yokuklwebha izimoto zabanye, kumele usizwe ngabafana bakupakise uma uhlehla. INANI Isuzu KB 250 Double Cab X-Rider R 388 400.00
Zonke ziphuma ne-warranty yeminyaka emihlanu noma ibanga lika-120 000km nohlelo lwe-roadside assistance, i-anti corrosion warranty yeminyaka emihlanu ne-service plan yeminyaka emihlanu noma ibang lika-90 000 km. Kumele uyise kwisevisi njalo ngemuva kwebanga lika-15 000.