Igabe ngobuhle nangamandla iFord Everest

IMOTO: FORD EVEREST

SEKUSELE ukuthi bazame ukuyenyusa intaba ende kunazo zonke emhlabeni iMount Everest ingadlangadla yabo kwaFord abayiqambe ngegama lale ntaba, i-Everest.

Lokhu ngikusho ngoba inqamula noma yikuphi ngaphandle kokuzwela.

Emakethe ihlukene ngezinhlobo eziyisishiyagalombili kodwa kulokhu sizogxila kwi-2.2 XLS 4x4.

Le moto ikhiqizwa embonini yakwaFord esePitoli kulandela ukuthi le nkampani itshale uR2.5 billion.

Ungakwazi ukuyenza imoto yomndeni kwazise ilayisha abagibeli abayisikhombisa futhi uyisebenzisele ukuzikhipha nabangani uma niyopepenyeka.

Ibhuthi yayo ingu-1 050 litres uma ulalise izihlalo zokugcina kodwa uma ulalise ezokugcina neziphakathi nendawo iba ngu-2 010 litres.

Uma uhleli ezihlalweni zokugcina uthi ukuphakama kancane ukuze uwubone kahle umgwaqo futhi engikuthandayo wukuthi inanezindawo zokubeka iziphuzo zakho. Ngaphambili “iwumhlobo mdi” ngoba ishaya ngoxhaxha lwamabhathini ne-screen esincane lapho ubona khona umsakazo. Izimoto zakamuva sezishaya ngama-touchscreen manje. Kodwa okuhle wukuthi kuso leso screen ukwazi ukubona ingemuva uma uhlehla kwazise inekhamera.

Indlela eyakhiwe ngayo i-Everest yenza ungesabi nakancane ukuyihloma kunoma yimuphi umgwaqo, kungaba owubhuqu noma oyitiyela.

Ngaphandle nje kwamandla, enye into ekhangayo ngayo wubuhle. Isakhiwo sayo sixoxa indaba ngokwethembeka nobuhle futhi lokhu ngingufakazi wakho ngoba yeqa ngisho nenguzunga yetshe elineminyaka. Iwushiyile umhlaba ngo225mm okwenza ikwazi nokweqa kalula izinguzunga zamatshe ezintabeni.

Njengoba kuyinqanawe yokuqwala izintaba iphuma ne-Terrain Management System eyenza ukuthi umshayeli akwazi ukuyishintsha ihambisane nesimo somgwaqo esuke ikuwo ngaleso sikhathi. Kukhona indlela ejwayelekile ongayishayela ngayo ebizwa nge-normal.

Uma kwenzeka ungena endaweni eneqhwa noma enotshani okanye ubhuqu, ungayihlela ngendlela yakhona, ngeke ubhajwe esihlabathini ngoba ikhona indlela eshayelwa ngayo ebizwa nge-sand ne-rock ematsheni.

Ngaso sonke isikhathi idonsa ngawo womane amasondo lokhu okuyenza ukuthi ibambelele emgwaqweni kodwa uma uthanda uyakwazi ukuyenza idonse ngawangemuva kuphela.

Ngiyacabanga nje ukuthi uma igcina iyiqwalile intaba i-Everest, ngeke kube yinkinga ukwehla ngoba ineHill Descend Control eyenza ukuthi yehle ngesizotha ngaphandle kokuthi umshayeli anyathele ibhuleki.

U-gearbox wayo uyi-6 speed Manual transmission futhi kulula nokufaka amagiya. Amandla ayo enza ukuthi ungalokhu uqala phansi amagiya ezintabeni futhi engikuqaphelile kuyo wukuthi emgwaqweni ovulekile ayizwakali uma isihamba ngo-120km/h.

Injini yayo ingu-2.2 litre enamandla angu-118 kW netorque engu-285 Nm.

Ezinye izinto enazo zihlanganisa i-Electronic Stability Programme neTraction Control, Hill Launch Assist neTrailer Sway Control kwazise inetowbar yokudonsa inqola enesisindo esingu-3 000kg.

Kwezokuphepha inama-airbag amabili ngaphambili, awasemaceleni nama-curtain airbags futhi uma uthanda uyakwazi ukufaka neyasedolweni kumshayeli. Inani

FORD EVEREST 2.2 TDCI XLS 4X4 6MT R537 900

Iphuma ne-warranty yeminyaka emine noma ibanga lika-120 000km, service plan yeminyaka emihlanu noma u-100 000km ne-roadside assistance yeminyaka emithathu ne-corrosion warranty yeminyaka emihlanu.

Kumele uyiyise kwisevisi njalo ngemuva kokuhamba u-20 000km futhi uma uyithenga uyaqeqeshelwa ukuyishayela kwazise iyi-4x4.