Okumele ukwenze uma udunwa imoto
UYAQALA kule nyanga umkhankaso kaMiss South Africa, uDemi-Leigh Nel-Peters, i-Unbreakable wokufundisa abesifazane ngokumele bakwenze uma besesimeni esinzima sempilo, njengokudunwa imoto.
UDemi-Leigh usebenza ngokubambisana noMark Grobbelaar ongungoti wekarati owashiya umsebenzi waqala inhlangano ebizwa ngeWoman INPowered (WIP) yokusiza abesifazane.
UDemi-Leigh ubambisene nenkampani yokufundisa ukushayela iMasterDrive.
“I-Unbreakable ihlose ukufundisa nokufukula abesifazane baseNingizimu Afrika. Lokhu bangaqala ukukwenza ngokuzinakekela nokuthatha izinqumo eziphusile.”
Uthe okumgqugquzele ukuthi aqale umkhankaso yinto eyamehlakalela babezama ukumduna imoto ekuqaleni konyaka.
“Kwakuyinto enzima kodwa ngamelana nayo ngendlela ngoba ngafunda kwiWIP neMasterDrive okwakugxile kakhulu kwabesifazane uma bedunwa izimoto noma bebanjwa inkunzi ukuthi kumele bamelane kanjani nalesi simo nokuthi bangamshiya kanjani abathandana naye uma ebashlukumeza.”
Uthe uyakholelwa wukuthi ulwazi lubalulekile futhi akufunda kulokhu kwamsiza.
Umqondisi wakwaMasterDrive, u-Eugene Herbert, uthe kumnandi kubo uma bezwa ukuthi izifundo zabo zokudunwa zisiza abantu.
“Inhloso yethu wukusiza wonke umuntu ozithola ekulesi simo ukuthi aphunyuke ngokuphepha. Ngigqugquzela wonke umuntu ofunda lokhu ukuthi abelane nabantu abaningi.” kusho uHerbert.
Kusasa uzobe eseMamelodi, ngoMgqibelo ozayo abe seKapa futhi usazoya eSoweto, Diesploot naseTimes Square, ePitoli. Kumahhala kwabesifazane abawu-150 kodwa kumele bazibekisele indawo.