Kuzokhonjiswa nezamzukwana

BAZOTHOLA ithuba lokubona izimoto ezinhlobonhlobo abathandi bezimoto abazohambela umbukiso iWesBank Motoring Experience eKyalami kusukela namhlanje kuze kube yiSonto.

Ngeke kugcine ngokukhonjiswa izimoto ezintsha kodwa kuzobe kukhona nezekhethelo njengezejubane kuya kwezamzukwana. Ezinye abantu bazozishayela noma bazibuke ezihamba enkundleni.

UKonstantin von Vieregge oyisikhulu esiphezulu enkampani engabahleli iSA Shows Messe Frankfurt, uthe abantu, hhayi kuphela abathandi bezimoto kodwa umndeni wonke, bazobhema bakholwe.

Lo mbukiso wesekwa yiNational Association of Automobile Manufacturers of South Africa. Kuzobe kukhona izinkampani zezimoto ezingaphezulu kuka-20. Iningi lazo lizibekisele indawo yokuthi zikwazi ukuhambisa izimoto zazo enkundleni futhi kuzoba nezejubane ezizobe zigijjima.

Izimoto ezinkulu ikakhulukazi amaSUV nazo zizobe zinenkundla yazo.

Kuzobe kukhona iPuma Energy 4x4 Village lapho khona abantu bengakhetha phakathi kokuhlola izimoto ezimbili okuyiNissan Navara entsha noma iVolkswagen Amarok engu-3 litre. ILand Rover yona izonikeza abantu ithuba lokuhlola amandla ezimoto zayo uma zidonsa izikebhe noma izinqola.

Kuzobe kukhona izimoto ezingu-140 zamzukwana.

Kuzophinde kugujwe iminyaka engu-50 kwasungulwa i-AMG noMercedes-Benz, iminyaka engu-70 yeFerrari, iminyaka engu50 yePerana nokunye.

Izivakashi zizophinde zithole ithuba lokuxoxa nezinkakha zezimoto zomjaho okubalwa kuzo uSarel van der Merwe, Ian Scheckter, Willie Hepburn, Ben Morgenrood, Graham Duxbury, Arnold Chatz, Basil Green, Geoff Mortimer, Paolo Cavalieri, Mick O’Sullivan, Larry Wilford, Grant McCleery noFranco Scribante.

Namhlanje kuqala ngo-10 kuya ku-7 ebusuku, kusasa nangeSonto kuzoqala ngo-9 kuya ku-8 ebusuku.

Kungenwa ngoR150 abadala, R75 izingane ezineminyaka ephakathi kuka-12 no-12 kuthi ezingaphansi kuka-12 kube uR10.