Unethemba lokuthi izinto zizoshintsha kwiBucs
UMDLALI wasesiswini we-Orlando Pirates, u-Abbubaker Mobara, ukholwa wukuthi izinguquko ezifike nomqeqeshi omusha, uMilutin “Micho” Sredojevic, zizobuyisela iqembu ezingeni elaziwa ngalo.
USredojevic ukhuze ibuya kwiPirates emuva kweminyaka eqeqesha e-Uganda nalapho eqophe khona umlando efaka leli zwe emqhudelwaneni i-Africa Cup of Nations. Ungene endaweni kaKjell Jonevret osule ingakaqali isizini. Kusukela efikile uSredojevic kubonakale izinguquko eziningi okukhona kuzona ukuthola ithuba lokudlala kwabadlali abebelizwa ngendaba ijezi ngesizini edlule.
Kulaba badlali kukhona uGladwin Shitolo noNtsikelelo Nyawuza, kanti kukhona noThabo Qalinge noLuvuyo Memela esiswini. IPirates, eqede isizini edlule ngaphandle kwe-Top 8, ayikahlulwa kusukela kuqale isizini ka-2017/2018. Ihlule iChippa United ngo 1-0, yadlala ngokulingana ngo 1-1 neBaroka.
UMobara, oqale isizini yesibili kwiPirates, ungomunye wabadlali athembele kubona uMicho. Uyijoyine ekuqaleni kwesizini edlule esuka kwi-Ajax Cape Town.
“Ziningi izinguquko ezenzekile eqenjini ezinhle futhi iqembu libukeka lizamukela kahle. Umqeqeshi ufuna senze okufanele ukuze sizoya phambili, siwine imidlalo, sinyukele kwelinye izinga. Ibhola linjalo, ngeke uhlale ubeka izaba, uzivikela. Kufanele uyithathe indlela enzima ngoba iyona engcono,” kusho uMobara.
“Umqeqeshi usibuyisele emuva esisekelweni sokudlala ibhola, wasenza sakuqonda okungasenza siwine imidlalo. Umdlali ngamunye kufanele azimisele ukuziqeqesha kanzima ngoba lokho kuzodingeka emidlalweni yethu.”
Ukushaya into ephansi kwePirates ngesizini edlule, kunenge abalandeli bayo nababonakale besusa uthuthuva emidlalweni ehlukene, bethela isibhaxu kubadlali. Ngaphezu kwalokho bajikele abadlali ngabanye bebasola ngokungazinikeli. Kubadlali abagxekwe ngalokhu kukhona nobengukaputeni u-Oupa Manyisa osegijima kwiMamelodi Sundowns. “Abalandeli balindele okukhulu kwiPirates kodwa uma uzithwesa khona, uzenzela kube nzima. Okwenzeke ngesizini edlule, ngoba kade sihlulwa, kube nezidubedube ezenzekile njengasemdlalweni wabakhaya noweSundowns kulimala nabantu. Lokho kuletha ingcindezi enkulu,” kusho uMobara.
“Kuningi esingakulindela kule sizini. Abadlali bayazi ukuthi bekunjani ngesizini edlule kodwa lokho kufanele sikhohlwe yikhona, kungenzeki kule sizini. Uma ukholelwa kuwena izinto ziyashintsha. Ngiyazi ukuthi kunzima kwabanye bethu ukucabanga osekudlule nokuzama ukukulungisa kule sizini kodwa kufanele sizithembe futhi sithembele nakuMdali. Izinto zizoshintsha ngokushesha.”